ئەو فەرمانبەرانەی کۆچی دواییان کردووە چۆن زەوییان پێدەدرێت؟

ئاڤا نیوز

 

پرۆسەی وردبینیکردن لە فۆڕمی پێدانی زەوی بە خانەنشین و فەرمانبەران بەردەوامە، ئەو کەسانەی مافی وەرگرتنی زەوییان هەیە و کۆچی دواییان کردووە، بەشێوازی جیاواز مامەڵەیان لەگەڵ دەکرێت.

 

وێنە گەورەکە: لە پرۆسەی دابەشکردنی زەوی زیاتر لە 400 هەزار فەرمانبەر و خانەنشین لە سەرجەم ناوچەکانی هەرێمی کوردستان بەگوێرەی چەند ڕێنماییەک سوودمەند دەبن، تیمێکی فراوانی وەزارەتی شارەوانی کار لەسەر وردبینیکردن و ئامادەکردنی فۆرمەکان دەکات، بۆ ئەوەی ئەوانەی بەپێی ڕێنمایی پرۆسەکە دەیانگرێتەوە ڕەوانەی ئەنجوومەنی وەزیران بکرێت.

 

لێدوانی فەرمی: مەروان عەبدولـلەتیف، سەرۆکی لیژنەی وردبینی دابەشکردنی زەوی لە وەزارەتی شارەوانی بە ئاڤای گوت، "ئەو کەسەی پێش وادەی پڕکردنەوەی فۆڕم کۆچی دوایی کردبێت لە پرۆسەکە سوودمەند نابێت، ئەوانەی دوای پڕکردنەوەی فۆڕم کۆچی دواییان کردووە زەوییەکە بۆ وارسەکەی دەبێت و بەناوی وارس ئاراستە دەکرێت."

 

ئەمەش بزانە: دوای ورردبینی وەزارەتی شارەوانی فۆڕمی خانەنشینان و فەرمانبەران ئاراستەی ئەنجوومەنی وەزیران دەکرێت، دوای وەرگرتنی ڕەزامەندی فۆڕمەکان دەگەڕێنەوە وەزارەتی شارەوانی و دواتر ڕادەستی وەزارەتە پەیوەندیدارەکان دەکرێتەوە.