لەبارەی وەرگرتنی سێ هەزار دینار بۆ کۆکردنەوەی هەر سەگێک هۆشداری دەدرێت

ئاڤا نیوز

دوای بڵاوبوونەوەی دەنگۆیەک لەبارەی کۆکردنەوەی سەگی بێلانە، بەڕێوەبەری خزمەتگوزاریی ژینگەپارێزی هەولێر دەڵێت، هیچ کەسێک ناتوانێت بە هەڕەمەکی و سەربەخۆ سەگ بگرێت و سێ هەزار دینار بۆ کۆکردنەوەی هەر سەگێک وەربگرێت.

چیرۆکی سەرەکی: لە نێو تۆرە کۆمەڵایەتییەکان بابەتێک بە ناونیشانی "سەگێک بگرە و سێ هەزار دینار وەربگرە" بڵاوکراوەتەوە، کە مەبەست لێی کۆکردنەوەی سەگە بێلانەکانە لەنێو کوچە و کۆڵانەکانی شاری هەولێر، ئاڤا میدیا بەدواداچوونی بۆ ئەو پرسە کرد و ڕاستییەکان دەخاتەڕوو.

لێدوانی فەرمی: ژیار جەلال، بەڕێوەبەری خزمەتگوزاریی ژینگەپارێزی هەولێر بە ئاڤای ڕاگەیاند: هیچ کەسێک ناتوانێت سەربەخۆ و بە هەڕەمەکی دەست بە کۆکردنەوەی سەگی بێلانە بکات، لەبەرانبەر هێنانی هەر سەگێکیش بڕی سی هەزار دینار وەربگرێت، چونکە ئەو کارە پێویستیی بە تیم و کەسانی شارەزا هەیە و دەبێت بەپێی ڕێنماییەکان کار بکەن. تەنیا ئەو کەسانە دەتوانن ئەو کارە بکەن، کە لەژێر سەرپەرشتیی ئەوان دان.

زانیاریی زیاتر: ڕۆژانە شەش کەس بە دوو ئامێری تایبەت بە کۆکردنەوەی سەگی بێلانە، لە گەرەکەکانی هەولێر دەگەڕین و 40 بۆ 50 سەگ کۆدەکەنەوە. هەر کەسێک ئامێری پێویستی هەبێت و بتوانێت ئەو کارە بکات، پێویستە گرێبەستی لەگەڵ بکرێت، چونکە کۆکردنەوەی سەگی بێلانە بەشێوەی هەڕەمەکی نییە و تیمەکان بەپێی پێویستیی گەڕەکەکان بەگەڕ دەخرێن.