لێبووردنی تایبەت بۆ ژمارەیەک بەندکراو دەردەکرێت

ئاڤا نیوز

لێبووردنی تایبەت بۆ ژمارەیەک بەندکراو دەردەکرێت، ئەو زیندانیانەی حوکمی لەسێدارەدان و نەخۆشی درێژخایەن و قورسیان هەیە ئازاد دەکرێن.

 

وێنە گەورەکە: بەڕێوەبەرایەتیی گشتیی چاکسازییەکانی هەرێمی کوردستان ناوی 100 بەندکراوی بە لیژنەی پشکنبینی وەزارەتی تەندروستی داوە، سەرجەمیان حوکمی لەسێدارەدان و نەخۆشیی درێژخایەنیان هەیە، بۆ ئەوەی پشکنینی نەخۆشیان بۆ بکرێت، بەگوێرەی ئەنجامی پشکنینەکان و خراپی دۆخی تەندروستییان بڕیار لەسەر ئازادکردنیان دەدرێت.

لێدوانی فەرمی: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە ئاڤا میدیای ڕاگەیاند: بەشێک لەو بەندکراوانە ڤایرۆسی جگەر، شێرپەنجە و شەلەل دەماغیان هەیە، یان جەڵتە لێی داون و لەسەر عەرەبانەن ئازاد دەکرێن.

زانیاریی زیاتر: هەفتەی داهاتوو لە سەرۆکایەتیی هەرێمی کوردستان جارێکی دیکە کۆبوونەوەیەک دەکرێت بۆ ئەوەی بڕیار لەسەر ئازادکردنی بەشێک لەو بەندکراوە بدرێت، کە نەخۆشییەکەیان لە ئاستێکی بەرزداریە و دۆخیان خراپە. ئاڤا لە سەرچاوەیەکی نێو لیژنەکەوە زانیویەتی، ئەو بەندکراوانەی لێبووردنە تایبەتەکە دەیانگرێتەوە ژمارەیان 14 کەسە.

هۆکارە زانراوەکان: بەندکراوەکان دۆخی تەندروستیان زۆر خراپە، بەتەواوی پەکیان کەوتووە و هیچ چارەسەرێکیان نییە، ئامانجی ئازادکردنیشیان ئەوەیە ئەو تەمەنەی ماویانە لەنێو کەسوکاریان بەسەری ببەن.