ماکرۆن: ئۆکراینییەکان درک بەوە دەکەن کە ناتوانن هەموو خاکەکەیان وەربگرنەوە

ئاڤا نیوز

 

لە کۆتایی ئەم هەفتەیەدا ڕووسیا و ئۆکراینا لەسەر ڕاگرتنی شەڕی سێ ساڵەی نێوانیان کۆدەبنەوە و فەرەنساش دەڵێت، دەبێت شەڕ کۆتایی پێ بێت.

 

لێدوانی فەرمی: ئیمانوێل ماکرۆن سەرۆکی فەرەنسا ڕایگەیاند، دوای کۆتاییهاتنی جەنگی نێوان ئۆکراینا و ڕووسیا، ئۆکراینییەکان درک بەوە دەکەن کە ناتوانن هەموو خاکەکانیان وەربگرنەوە کە لە ساڵی 2014ەوە لەلایەن ڕووسیا دەستی بەسەرداگیراوە.

 

لەبارەی بە ئەندامبوونی ئۆکراینا لە هاوپەیمانیی ئەتڵەسی ناسراو بە ناتۆ، ئیمانوێل ماکرۆن گوتی، "کیێڤ ناچێتە ناو ناتۆوە بەهۆی نەبوونی کۆدەنگی لەسەر ئەو پرسە".

 

سەرۆکی فەرەنسا وتیشی، دەبێت شەڕ کۆتایی پێبێت و ئۆکراینا لە باشترین دۆخدا بێت بچێتە ناو دانوستانەکانەوە، کە ڕێگە خۆشدەکات بۆ چارەسەرکردنی پرسی خاکەکەی.

لەلایەکی دیکە: ڤۆلۆدیمیر زێلێنسکی، سەرۆکی ئۆکراینا داوای لە هاوپەیمانە ڕۆژئاواییەکانی وڵاتەکەی کرد، کە هیچ  بەشێکی ئۆکراینا بە دیاری نەدەن بە ڤلادیمێر پووتین، سەرۆکی ڕووسیا بۆ کۆتاییهێنان بە شەڕەکە.

 

ئەوەی لەبارەیەوە دەگوترێت: بەگوێرەی میدیاکانی ڕۆژئاوا، واشنتۆن بیر لەوەدەکاتەوە دان بنێت بەو شوێنانەی ڕووسیا لە شەڕی ئۆکراینا داگیری کردوون و وەک بەشێک لە خاکی ڕووسیا بیانناسێنێت.

 

ئەوەی ئێستا ڕوودەدات: سوپای ڕووسیا نزیکەی 20%ی خاکی ئۆکراینای داگیرکردووە. مۆسکۆ لکاندنی چوار ناوچەی ئۆکراینای ڕاگەیاندووە بە وڵاتەکەی خۆیەوە کە دەکەونە باشوور و ڕۆژهەڵاتی دراوسێکەیەوە، ئەمە جگە لە نیمچە دورگەی کرایمیا کە لە ساڵی 2014 لکاندویەتی بە خاکی وڵاتەکەیەوە.