داشکان لە پڕۆژەی ڕووناکی دەکرێتە سێ مانگ

ئاڤا نیوز

ئەو گەڕەک و شوێنانەی کارەبای 24 کاتژمێرییان پێدەگات، حکومەتی هەرێمی کوردستان تاوەکو ئێستا دوو مانگی یەکەم داشکانی بۆ دەکردن، لەمەدواش داشکانەکە دەبێت سێ مانگ.

وێنە گەورەکە: حکومەتی هەرێمی کوردستان نزیکەی ساڵێکە دەستی بە جێبەجێکردنی پڕۆژەی ڕووناکی کردووە، بە ئامانجی ئەوەی تاوەکو کۆتایی ساڵی 2026 کارەبای سەرتاسەری کوردستان بکاتە 24 کاتژمێری، بۆ ئەوەی لە سەرەتاش بارگرانی نەکەوێتە سەر شانی خەڵک بۆ ماوەی سێ مانگ داشکانیان بۆ دەکات.

شێوازی جێبەجێکردن: وەک تیمی ڕووناکی بە ئاڤایان گوتووە، هەر گەڕەکێک کە پڕۆژەی ڕووناکی پێدەگات، مانگی یەکەم بە قەبارەی 50% داشکاندن بۆ هەر ماڵ و هاوبەشێک دەکرێت، تاوەکو لەگەڵ پرۆژەکە ڕابێنن و بزانن چۆن کارەبا خەرج دەکەن، مانگی دووەمیش بە قەبارەی 25% و مانگی سێیەم بە قەبارەی 15% داشکانەکە دەکرێت.

ئەوەی پێویستە بیزانیت: نرخی کارەبای ماڵان بە پێنج ئاست دیاریکراوە، لە 72 دینارەوە دەستپێدەکات بۆ 350 دینار و بەپێی بەکارهێنان نرخەکەی زیاتر بەرز دەبێتەوە، بۆ هاوبەشانی تریش وەکو پیشەسازی و بارزگانی و کشتووکاڵی نرخەکە جێگیرە.