ئەردۆغان: میت چاودێری جێبەجێکردنی بڕیاری هەڵوەشاندنەوەی پەکەکە دەکات

ئاڤا نیوز

ئەردۆغان بڕیاری هەڵوەشاندنەوەی پەکەکە بە بڕیارێکی ئەرێنی ناوزەند دەکات و داوا دەکات پابەندی جێبەجێکردنی بڕیارەکەی خۆیان بێت. دەشڵێت، دەزگای هەواڵگریی تورکیا (میت) چاودێری جێبەجێکردنی بڕیاری هەڵوەشاندنەوەکە دەکات.

وێنە گەورەکە: دوای ئەنجامدانی کۆنگرە و ڕاگەیاندنی بڕیاری هەڵوەشاندنەوەی پەکەکە، ئێستا هەریەک لە ئەندامانی کۆنگرەی هەڵوەشاندنەوەی پەکەکە و سەرۆک و وەزیرەکانی تورکیا داوای پابەندبوون بە بەڵێن و بڕیارەکانی یەکتر دەکەن، ئەمڕۆ ڕەجەب تەیب ئەردۆغان لە وتارێکدا لە بەردەم پەرلەمانتارانی ئاک پارتی ئەم قۆناغەی بە قۆناغێکی نوێ لە هەوڵەکانی بوونیادنانی تورکیایەکی بێ تیرۆریست ناوزەند کرد.

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند: دەبێت پەکەکە پابەندی بڕیارەکەی خۆی ببێت و تەنها قسە نەبێت، بەڵکو بڕیاری کۆنگرەکەیان بە تەواوی جێبەجێبکرێت.

- دەزگای هەواڵگریی تورکیا (میت)  چاودێری جێبەجێکردنی بڕیاری هەڵوەشاندنەوەکە دەکات و دەمانەوێت دڵنیا ببینەوە لەوەی هەموو کارەکان بەو شێوەیەی بڕیاری لەسەر دراوە بڕوات بەڕێوە.

لەلایەکی دیکەوە: ئەردۆغان داوای لە گرووپەکانی پەیوەست بە پەکەکە لە سوریا و ئەوروپا و وڵاتانی دیکە کرد، هەمان بڕیاری کۆنگرە جێبەجێ بکەن و دەستبەرداری چەک ببن و هەڵوەشاندنەوەی خۆیان ڕابگەیەنن.