ئەو هاوبەشانەی پێش جێگیرکردنی نرخی کارەبا پارەی زیادیان بۆ هاتۆتەوە بۆیان دەگەڕێنرێتەوە

ئاڤا نیوز

تیمی پڕۆژەی ڕووناکی دەڵێن، دوای ئەوەی بڕیار لەسەر نرخی کارەبای پڕۆژەی ڕووناکی درا و بەراورد بە نرخی پێشوو کەمترە، بڕیاردراوە، بەشێوەی ڕەسید بۆ هاوبەشانی پێشتر بگەڕێندرێتەوە.

وێنە گەورەکە: ڕۆژی 2024-10-17، مەسرور بارزانی، سەرۆکوەزیرانی کوردستان لە گەڕەکی شادی هەولێر پڕۆژەی ڕووناکی ڕاگەیاند، بڕیار وایە تا کۆتایی ساڵی 2026 کارەبای 24 کاتژمێری بگاتە هەموو ماڵێک لە کوردستان.

ڕاگەیێنراوی فەرمی: تیمی پڕۆژەی ڕووناکی ڕایانگەیاند، ئەو هاوبەشانەی بەشێوەی ئەزموونی پارەی کارەبای پڕۆژەی ڕووناکییان داوە، ئەو بڕە زیادەیەی خەرجیانکردووە، لە مانگەکانی داهاتوودا بە شێوەی کرێدیت واتا (ڕەسيد) بۆیان دەگەڕێنرێتەوە. ئەمەش واتا ئەو نرخەی ئێستا دانراوە بۆ هەموو مانگەکانی ڕابردووە.

باکگراوند: ئەم هەفتەیە پڕۆژەی ڕووناکی نرخی نوێی کارەبای 24 کاتژمێری بڵاوکردەوە، بەراورد بە نرخە ئەزموونییەکە هەرزانتر کراوە و نرخەکان بەمجۆرە دیاریکراون:

لە یەک کیلۆ وات تا 400 کیلۆ وات بە 72 دینار.

لە 401 کیلۆ وات تا 800 کیلۆ وات 108 دینار.

لە 801 کیلۆ وات تا 1200 کیلۆ وات 175 دینار.

لە 1201 کیلۆ وات تا 1600 کیلۆ وات 265 دینار.

لە 1600 کیلۆ وات بەسەرەوە نرخەکەی 350 دینارە.