سوودانی: 40 ملیۆن دۆلار بە غەززە و لوبنان دەبەخشین

ئاڤا نیوز

 

سەرۆکوەزیرانی عێراق لە 34 ـەمین کۆبوونەوەی لووتکەی وڵاتانی عەرەبی لە بەغدا، 18 دەستپێشخەریی ڕایگەیاند، لەنێویاندا بەخشینی  20 ملیۆن دۆلار بۆ ئاوەدانکردنەوەی غەززە و 20 ملیۆن دۆلاری دیکەش بۆ لوبنان.

 

چیرۆکی سەرەکی: ئەمڕۆ شەممە، 17ـی ئایاری 2025، 34ـەمین لووتکەی کۆمکاری عەرەبی لە بەغدا بە بەشداریی 22 وڵات بەڕێوەدەچێت. بەشێکیان لە لە ئاستی سەرۆکی وڵات لە لووتکەکەدا بەشداریان کردووە، بەشێکی دیکەشیان وەزیری دەرەوەیان وەک نوێنەری خۆیان ناردووە.

 

لێدوانی فەرمی: محەممەد شیاع سوودانی، سەرۆکوەزیرانی عێراق لە وتارێکدا کەلەدەستپێکی لووتکەکەدا پێشکەشیکرد، ڕایگەیاند: نامانەوێت ئەم لووتکەیە تەنیا دیدار و کۆبوونەوەی ئاسایی بێت، بەڵکو هیوادارین دەرەئەنجامی بۆ خزمەتکردنی وڵاتانی عەرەبی هەبێت.

 

سوودانی گوتی، بۆ کاری هاوبەش لەنێوان وڵاتانی عەرەب، 18 دەستپێشخەریی گەورە ڕادەگەیێنین، لە نێویاندا دامەزراندنی سندووقێکی عەرەبی بۆ پشتیووانیکردن لە بوژانەوە و ئاوەدانکردنەوەی ئەو  وڵاتانەی دووچاری قەیران و ململانێ و شەڕ دەبنەوە. 

 

بەگوتەی سەرۆکوەزیران، عێراق لەو سندووقەدا 20 ملیۆن دۆلار بۆ ئاوەدانکردنەوەی غەززە و 20 ملیۆن دۆلاری دیکەش بۆ ئاوەدانکردنەوەی باشووری لوبنان دەبەخشێت.

 

هاوکات لە گوتارەکەیدا کە لەبەردەم سەرۆک و سەرکردەی وڵاتانی عەرەبی پێشکەشی کرد، سوودانی پێشنیازی سێ سەنتەری هاوبەشی کرد لە نێوان وڵاتانی کۆمکاری عەرەبی بۆ ڕووبەڕووبونەوەی تێرۆر، ماددەی هۆشبەر و گۆڕانکاریەکانی کەشوهەوا.