یەکەم کاروانی حەجخوازانی کوردستان گەیشتە سعودیە

شەیری بکە لە:
یەکەم کاروانی حەجخوازانی کوردستان گەیشتە سعودیە

ساتی بەڕێکەوتنی حەجخوازان بەرەو سعودیە؛ وێنە محەممەد شوانی - ئاڤا نیوز

ئاڤا نیوز

 

کاروانی یەکەمی ئەو حەجخوازانەی لە هەرێمی کوردستانەوە بەرەو سعودیە بۆ بەجێهێنانی فەریزەی حەج بەرێکەوتن، گەیشتە خاکی سعودیە و سبەی بەرەو شاری مەدینە بەڕێ دەکەون.

 

وێنە گەورەکە: ڕۆژی شەممە، 16-5-2025، یەکەم کاروانی حەجخوازانی هەرێمی کوردستان کە پێکهاتبوون لە هاونیشتمانییانی شارەکانی، سلێمانی، هەڵەبجە، ئیدارە سەربەخۆکانی گەرمیان و ڕاپەڕین لە رێگەی گەشتی وشکانی گەیشتنە خاکی سعودیە و سبەی بەرەو شاری مەدینە بەڕێ دەکەون، یەکەمین گەشتی حەجخوازانیش بەڕێگای ئاسمانی ڕۆژی 19ـی بەڕێ دەکەون.

 

لێدوانی فەرمی: کاروان ستوونی، وتەبێژی بەڕێوەبەرایەتیی حەج و عومرەی کوردستان بە ئاڤا میدیای ڕاگەیاند، "پێش نیوەڕۆی ئەمڕۆ یەکەم کاروانی حەجخوازان کە ژمارەیان 716 کەس بوو، گەیشتنە خاکی سعودیە، سبەی بەرەو شاری مەدینە بەڕێدەکەون و لەنێوان کاتژمێر 4 بۆ 5ـی ئێوارە دەگەنە شاری مەدینە و لەوێ لیژنەیەک پێشوازییان لێ دەکات".

 

لەبارەی نەخۆشکەوتنی حەجوازان، کاروان ستوونی  دڵنیایی دەدات و دەڵێت، "تاوەکو ئێستا هیچ حاڵەتێکی نەخۆشی لەناو حەجخوازان تۆمار نەکراوە".

 

سەبارەت بە حەجخوازانی سنووری هەولێریش، کاروان ستوونی گووتی: ئەمڕۆ 951 حەجخوازی پارێزگای هەولێر، دهۆک، ئیدارە سەربەخۆکانی زاخۆ و سۆران بەڕێکەوتن و شەو لە کەربەلا دەمێننەوە و سبەی بەڕێگەی وشکانی دەگەنە خاکی سعودیە.

 

زانیاریی زیاتر: حکومەتی هەرێمی کوردستان وەک پاڵپشتییەک بۆ حەجخوازانی ئەمساڵ، لەسەر ڕاسپاردەی مەسرور بارزانی، سەرۆکوەزیرانی کوردستان، بڕی چوار ملیار و 200 ملیۆن دیناری وەک پاڵپشتی حەجخوازان تەرخانکردووە.

 

باکگراوند: ئەمساڵ لە هەرێمی کوردستانەوە، پێنج هەزار و 136 حەجخواز گەشتی حەج دەکەن، لەو ژمارەیە هەزار و 440 کەسیان بەڕێگای وشکانی گەشت دەکەن.

زیاتر لەسەر ئەم بابەتانە بکۆڵەرەوە

شەیری بکە لە: