سەرۆکی هەرێمی کوردستان سەردانی تاران دەکات

ئاڤا نیوز

سەرۆکی هەرێمی کوردستان بۆ بەشداریکردن لە دیداری تاران بڕیارە سەردانی ئێران بکات و لەبارەی دیدگای هەرێمی کوردستان بۆ داهاتووی ناوچەکە قسە دەکات.

وێنە گەورەکە: ئەمڕۆ 17-5-2025، نێچیرڤان بارزانی، سەرۆکی هەرێمی کوردستان سەردانی بەغدای کرد، بڕیارە دواتر سەردانی ئێران بکات.

ڕاگەیێنراوی فەرمی: سەرۆکایەتیی هەرێمی کوردستان بڵاویکردەوە، لەسەر بانگهێشتی فەرمی بۆ بەشداریکردن لە دیداری تاران بۆ گفتوگۆ، ئێوارەی ئەمڕۆ نێچیرڤان بارزانی بە سەردانێک دەگاتە تاران.

زانیاریی زیاتر: لەلایەن وەزارەتی دەرەوەی کۆماری ئیسلامی ئێرانەوە دیدارەکە ڕێکخراوە و سبەی یەکشەممە بەڕێوەدەچێت.

زانیاریی بەدەستهاتوو: بەگوێرەی کارنامەی دیدارەکە، نێچیرڤان بارزانی لە مێزگردێکدا، لەبارەی دیدگای هەرێمی کوردستان بۆ داهاتووی ناوچەکە قسە دەکات، هەروەها جەخت لە هاوبەشی لەسەر بنەمای ڕێزگرتن لە بەرژەوەندییە هاوبەشەکان دەکاتەوە.

ئەوەی پێویستە بیزانیت: بڕیارە لە چوارچیوەی سەردانەکەیدا، نێچيرڤان بارزانى له‌گه‌ڵ سه‌ركرده‌ و به‌رپرسانى باڵاى كۆمارى ئيسلاميى ئێران كۆ‌ببێته‌وە، هەروەها په‌یوه‌ندییه‌کانی ئێران له‌گه‌ڵ عێراق و هه‌رێمی کوردستان و دۆخی ناوچه‌که‌ به‌گشتیی تاوتوێ ده‌که‌ن.