بۆری ئاوی ئیفراز سێی هەولێر بۆچی شکا؟ لە 24 کاتژمێری داهاتوودا چاک دەکرێتەوە

ئاڤا نیوز

بەڕێوەبەرایەتیی گشتیی ئاو و ئاوەڕۆی هەرێمی کوردستان، لەبارەی چاککردنی بۆڕی ئاوی ئیفراز سێ ڕایگەیاند کە تیمەکانیان ئێستا سەرقاڵی چاککردنەوەن.

چیرۆکی سەرەکی: دوا نیوەڕۆی ئەمڕۆ 19-5-2025، بۆڕی ئاوی ئیفراز سێ لەنێوان گوندەکانی دارەبەن و گەزنە لە هەولێر شکا، هاونیشتمانیانیش نیگەرانن و دەڵێن هێشتان هاوین نەهاتووە و بۆڕییەکانی ئیفراز دەستیان بەشکان کرد.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای ڕاگەیاند: هۆکاری شکانی بۆڕییەکە هاووڵاتییەکی نابەرپرس بووە، کە هەستاوە بە کاری هەڵکەندن و بەوهۆیەوە بۆڕیەکە شکاوە، هەروەها بۆڕییەکەش بۆڕیەکی کۆنی 'جی ئاڕ تی'ـیە، ئێستا تیمەکانی ئەندازە چوونەتە شوێنی شکانی بۆڕییەکە و سەرقاڵی چاککردنن.

- لە ماوەی 24 کاتژمێردا بۆڕییەکە چاک دەکرێتەوە، تاوەکو ئەو کاتەش بیرەکان لەو شوێنانە ئیش پێ دەکەین.

ئەوەی پێویستە بیزانیت: بۆڕی ئاوی ئیفراز سێ 33%ی شاری هەولێری لەسەرە کە سنووری شارەوانییەکانی سێ و چوار و بەشێک لە شارەوانییەکانی یەک و پێنجیش دەگرێتەوە.