جەنگێکی نوێی بێ دوکەڵ؛ لە پیرۆزی خاکەوە بۆ پیرۆزی خود

سەرۆک مەسعود بارزانی لە کۆنگرەی یەکخستنەوەی هەردوو ڕێکخراوی قوتابیان و لاوانی پارتیدا گەلی کوردستانی ڕووبەڕووی پرسێکی پڕ مەترسی وچارەنووسساز کردەوە: بەبێ پەردە و بێ پێچ و پەنا پێی وتین: کێشە و شەڕ و ململانێی ئەمڕۆمان سەربازی نییە و لەبەرامبەر سوپایەکی پڕ چەکدا لە سەنگەردا نیین، بەڵکو لە سەنگەری خەباتێکی سەختداین لەپێناو پاراستنی بوونی ئەمڕۆ و سبەیمان.

 ئێمە بەخۆمان بزانین یان نەزانین لە بەرامبەر نەیار و دوژمنێکی لەڕادەبەدەر دڕندە داین کە بە ماددەی هۆشبەر ناسراوە و هیچی لە چەکی کیمیایی و بایۆلۆجی کەمتر نییە ئەگەر زیاتریش نەبێت.

 دوائامانجی جەنەڕاڵە دژە مرۆڤایەتییەکانی لەشکری دوژمن، گەیشتنە بە دەست و پەنجە و گیرفانی گەنج و هەرزەکاری ئەم میللەتە و میللەتانی تر بۆ ئەوەی پاش تێوەگلان و ئالوودە بوونیان، زەلیل و ئیفلیج و بێ کەرامەتیان بکەن، بەوەش بناغە و کۆڵەگە بنەڕەتییەکانی کۆمەڵگە دادەڕوخێنن.

- تا ئەوەی بە تۆپ و تەیارە و کیمیایی و ئەنفال و سێدارە پێی نەگەیشتن، لە ڕێگەی بێ ئیرادەکردنی نەوەی نوێوە پێی بگەن.

 

لێدانی ئەو زەنگی خەتەرە لەلایەن لووتکەی دەسەڵاتی سیاسیی لە کوردستان لە بۆنەیەکی تایبەت بە گەنجانی وڵات کە قوتابی و لاونە نیشانە و بەڵگەی ئەوپەڕی مەترسیداریی پرسی ماددەی هۆشبەرە و ڕەنگدانەوەی پێگەیشتنێکی سەرنجڕاکێشە لە دنیابینی و پەرەسەندنێکی ستراتیژییە لە تێگەیشتن و هۆشیاریی سیاسیی لووتکەی بڕیارداندا لە کوردستان.

 دەنگدانەوەی لەرینەوەی ئەو زەنگی خەتەرە لە گوێی هەر دایک و باوک و خوشک و برایەکدا لەم نیشتمانەدا بەسە بۆ ئەوەی تێبگەین، کە ڕاستە بە خەباتی چەکداری و خۆڕاگری توانیمان میللەتەکەمان لە تونێلی تاریکی کیمیایی و ئەنفال و زیندانەکان و بەرپەتی سێدارە و گۆڕی بەکۆمەڵ ڕزگاربکەین و لە ماوەی سی ساڵدا لە هیچەوە، لە سفرەوە، وڵاتێکی ئاراممان بونیادنایەوە.

ولاتێک  کە خەڵکەکەی شەق و لوولەی تفەنگی بێگانە بەسەر سەریەوە نییە و گەنجەکانمان بەپاڵ دیواری قوتابخانەکانیانەوە گوللە‌‌ باران ناکرێن و پارەی گوللەکانیش لە کەسوکاریان بسەنرێتەوە!

 سی ساڵە هەر هیچ نەبێ بە دەیان هەزار گەنج و بەساڵاچوومان وەک ڕانە مەڕ نادرێنە پێش بۆ بەرەی جەنگ و سەرکێشییەکانی ڕژێمێکی داگیرکەر و لەوسەرەوە تەرمی هەلاهەلابوویانمان بۆ ناگەڕێتەوە.!

 ڕاستە هەموو ئەوانە و زیاتریشمان بە خوێنی شەهیدان و خۆڕاگریی میللەت بەدەستهێنا، بەڵام ئێستا و لەم چرکەساتەدا بەخۆمان و هەموو دەسکەوت و ئارامی و خۆشییەکانمانەوە ڕووبەڕووی جەنگێکی بێ دووکەڵ، مەرگێکی کڕ و کپ و بێ دەنگ بووینەتەوە، ئەوەیش جەنگی ماددەی هۆشبەرە.!

 

سەرۆک بارزانی مەترسیی ماددەی هۆشبەر لە هەمان ئاست و باڵاتری شەڕی تۆپ و تەیارە و کیمیاییدا دادەنێت. دوژمنی سەرسەختی ئەمڕۆمان داگیرکەرێکی وێرانکەری شاراوەیە و تاک و خێزان و کۆمەڵگە ڕسوا و بێ ئیرادە دەکات.

لەو ڕوانگەیەوە  کە  بەرپرسیارێتیی پاراستنی کۆمەڵگە بەتەنها لە ئەستۆی حکومەت و دەزگا ئەمنییەکانیدا نامێنێت و دەبێتە بەرپرسیارێتییەکی گشتیی بەرەیەکی بەرگریی بەرفراوانی ئەخلاقی و کولتووری کە گشت لایەنە سیاسییەکان، ڕۆشنبیران، میدیا، زانکۆ، پەروەردە و مزگەوت و پەرستگەکان تیایدا بەشدار و کارا دەبن.

 

سەرۆک بارزانی هۆشدارییەکی تووندیدا لە مەترسییەکانی بەکارهێنانی ماددە هۆشبەرەکان کە تەنها تەندروستی و دەروون دروستیی تاک وێران ناکات و بەس، بەڵکو  بنەماکانی ئاکار و متمانە و وەفا، دۆستایەتی و سۆز و بەدەنگەوەچوون و هاوکاری و یادگەی بەکۆمەڵ و ڕەوایەتیی خودی خەباتی نەتەوەییش دەخاتە مەترسییەوە.

 

گوتارەکەی سەرۆک بارزانی هەمەلایەنە و گشتگیر بوو کە بابەتی سەرەکی  پرسی نەتەوەسازییە  لە ئاستی ململانێی جیۆسیاسی و  لە چوارچێوەی جیۆگرافیاوە بردە ئاستی  چارەی خۆنووسینی تاک و خێزان و کۆمەڵ. لە بەرگریکردن لە خاکەوە بۆ بەرگریکردن لە کەرامەت. لە چەمکی نەتەوەی شەڕکەرەوە بۆ "نەتەوەی هۆشیار و ژیاندۆست"! ئەمە ئەو شەڕەیە کە هیچ دوکەڵێکی نییە و بەرۆکی گرتووین.

 

جەوهەری ئەو گوتارەی سەرۆک دووبارە داڕشتنەوەی سەرەکی ئاسایشی نەتەوەییمان بوو: چیتر مەترسییەکە تەنها لە سەر سنوورەکانمان نییە، بەڵکو لەبەردەرگەی ماڵ و قوتابخانەجو شوێنی پشووماندایە.

ئەو مەترسییە دەیان خێزانی داڕزاندووە، ئاکار و ئاشتەوایی ناو ماڵی کوردیی سڕیوەتەوە و بە سەدان گەنجی کوردی بەتوانای ئیفلیج و بێ بەهرە و بێ بەرهەم کردووە. دوا خواست و ئامانجی جەنەڕاڵەکانی ئەم بەڵایەش لە پەلوپۆخستنی سەرمایەی مرۆیی کوردە بۆ ئەوەی چیتر ئینتیمامان بۆ نیشتمان و نەتەوە، بۆ ئاکاری کوردەواری و مرۆڤایەتی نەمێنێت، بەوەش هێڵی بەرگریی یەکەم و دووەم و سێهەمی ئەم میللەت و نیشتمانە هەرەس دەهێنێت و دەشکێن.

بۆیە لێرەوە تۆنی گوتارەکەی سەرۆک هەڵکشا بۆ ئاستی شوناس و ئینتیما بۆ نیشتمان و نەتەوە، بۆ ئەخلاق و بۆ مرۆڤایەتی؛ بە چەند ڕستەیەکی سادە بەڵام سەنگین، بناغەی ئەو پرنسیپەی داڕشتەوە کە لە نەبوونی هەست و ئینتما بۆ خاک و میللەت، ئیدی دەرگا بەڕووی داڕمانێکی مەترسیداری گشت بەها ئینسانییەکانی تردا دەکرێتەوە، ئاکام خاکێکی بێ ئەرزش و میللەتێکی ئیفلیج و بێ شوناس و زەلیل و ئاڵوودەبووی بێ کەرامەت، بەشمان دەبن.

 

سەرۆک بەو چەند ڕستە سادە و قووڵەی، هێڵە گشتییەکانی گوتارێکی ڕووبەڕوو بوونەوەی شکست و پاشەکشەی کولتووری کوردایەتیی داڕشت: بەرەنگاربوونەوەی ماددە هۆشبەرەکان یەکسانە بەپیرۆز ڕاگرتنی کوردایەتی و مەردایەتی.

 

بەرەنگاربوونەوەی ئەم بەڵایە تەنها بۆ پاراستنی تەندروستی و دەروون دروستیی تاکەکانی کۆمەڵگە نییە، بەڵکو خەباتێکی سەردەمییانە و بەرگرییەکی پڕ ئیرادەیە  لە کەرامەت و شکۆی میللەتێکی قوربانیدەر و ژیاندۆست.