هەژمارکردنی ئارەزومەندانەی نمرەکانی کوردی و عەرەبی پۆلی 12 هەڵوەشایەوە

ئاڤا نیوز

 

وەزارەتی خوێندنی باڵا و توێژینەوەی زانستی ڕایگەیاند، لە ساڵی داهاتووەوە هەژمارکردنی وانەکانی کوردی و عەرەبی بۆ پۆلی 12 هەڵدەوەشێتەوە و وەک وانەکانی دیکە نمرەکان هەژمار دەکرێت.

 

وێنە گەورەکە: ماوەی چەند ساڵێکە هەژمارکردنی وانەکانی کوردی و عەرەبی بۆ قوتابیانی پۆلی 12 بووەتە ئارەزوومەندانە، واتا ئەگەر قوتابییەک لە هەموو وانەکان نمرەی بەرز بهێنێت و لە وانەکانی کوردی و عەرەبی خراپ بێت، نمرەی ئەو دوو وانەیەی بۆ هەژمار ناکرێت، بەڵام مەرجە دەبێت لەو دوو وانەیە دەرچێت.

 

لێدوانی فەرمی: عەباس ئەکرەم، وتەبێژی وەزارەتی خوێندنی باڵاو توێژینەوەی زانستی بە ئاڤا میدیای ڕاگەیاند، بڕیاری هەڵوەشاندنەوەی هەژمارکردنی وانەکانی کوردی و عەرەبی بەپێی بڕیاری ژمارە حەوتی ساڵی 2022ـە، بەڵام بەهۆی ئەوەی پێویست بوو سێ ساڵ بەسەر ئەو قوتابیانە تێپەڕێت کە هاتوونەتە ئامادەیی، جێبەجێکردنی بڕیارەکە بۆ ساڵی داهاتوو دانرا واتا خوێندنی 2025-2026، ساڵی داهاتوو ئەم دوو وانەیە وەک وانەکانی دیکە لە سیستمی وەرگرتن هەژمار دەکرێن.

عەباس ئەکرەم ئەوەش دەڵێت: گشتاندنمان بۆ وەزارەتی پەروەردە کردووە، قوتابیان لەو بڕیارە ئاگادار بکەنەوە.