ئایا ڕێگای دووەم بوونی هەیە؟

ئەو گرێبەستانەی وەبەرهێنان لە كەرتی وزەی كوردستاندا بەم دواییانە حكومەتی هەرێمی كوردستان لەگەڵ كۆمپانیا ئەمریكییەكان ئەنجامیدان، بەشێكی بچووكە لە سیاسەتێكی گەورەتر لە پتەوكردنی پەیوەندیی ستراتیژی نێوان هەرێمی كوردستان و ویلایەتە یەكگرتووەكانی ئەمەریكا و پاشان بەشێكیشە لە سیاسەتی خودی ویلایەتە یەكگرتووەكانی ئەمەریكا لە وڵاتەكەدا: عێراق.

واتە ئەمە تەنها گرێبەستی ئابووری نییە، بەڵكو گرێبەستی سیاسیشە لە سەردەمێكی نوێ و قۆناغێكی نوێدا كە سەردەمی دۆناڵد ترەمپ و ستراتیژە نوێكانیەتی لە جیهان و ڕۆژهەڵاتی ناوەڕاست بە عێراقیشەوە.

لێرەدا پرسیار ئەوەیە: ئایا هەرێمی كوردستان بەشدار بێت لەم قۆناغە نوێیەدا لەگەڵ ویلایەتە یەكگرتووەكانی ئەمەریكا یاخوود تەحەفوز بكات؟

لە ڕاستیدا هەر ئەوەی تۆ وابزانی بۆ شەریكایەتی و هەماهەنگی و كاركردن لەگەڵ ئەمەریكا دوو ئیختیارت هەیە، بیكەیت یا نەیكەیت هەر ئەمە خۆی تێنەگەیشتنە لە ئەلف و بێی كاری سیاسی لە دنیای نوێ و جیهانی گڵۆباڵدا، بەڵكو پرسیارەكە تەنها ئەوەیە: چۆن بە باشترین شێوە بیكەیت.

ئەوانەی ڕەخنە لەم هەنگاوانەی چەند هەفتەی ڕابردووی مەسرور بارزانی لە واشنتن دەگرن لە ڕاستیدا ڕەخنە ناگرن بەمانای وشەی ڕەخنە كە بنەمای خۆی هەیە، بەڵكو جۆرێك لە كەشی بۆڵەبۆڵ و (من دژم كەواتە من هەم) پیادە دەكەن. دەنا دەبێ هەركەس ڕەخنە لە هەنگاوێكی ئاوا دەگرێت ئەرگۆمێنتی لۆژیكی بخاتە ڕوو، پێشمان بڵێت ئەگەر ئەمە ناكەین، ئەی چی دەكەین؟

ئەمەریكا درووستكەری عێراقی نوێیە بە هەرێمی كوردستانیشەوە، بەڵكو ئەوەندەی هەرێمی كوردستان لە بازنەی ئەجێندای ئەمریكادایە، لەوانەیە باشووری عێراق بەو شێوەیە نەبێت و ئەوێ زیاتر لە ئەجێندای بەریتانیادا بێت.

بەڵام بەهەر حاڵ، هەموومان دەزانین و ئەوە ئەلف و بێی سیاسەتە كە هەرێمی كوردستان لە پاش 1992 و عێراقیش بەگشتی لە پاش 2003 بە دواوە لەناو چەقی سیاسەتی ئەمریكیدایە. ئەمریكا لێرەوە سیاسەتی ڕۆژهەڵاتی ناوەڕاست بەڕێوە دەبات، ئەی بە گاڵتە سەدامی ڕووخاندوە و هەزاران سەربازی خۆی بە كوشتداوە؟

هەركەس لەم بنەمایەوە گوتاری سیاسی خۆی ئاراستە نەكات، كەواتە یان گەمژەیەكە و ڕێی كەوتۆتە ناو سیاسەت، یان چەواشەكارێكە و ڕای گشتیی فریو دەدات، وەك لە زۆر كەیسی دیكەدا بینیمان.

ئەوەی كە هەرێمی كوردستان سەركەوتووبووە لە پەیوەندیەكانی لەگەڵ ویلایەتە یەكگرتووەكانی ئەمەریكا، نەك جێی دەستخۆشیە و شایانی ئۆكەی هەمووانە- وەك بەنهێنی دەیكەن- بەڵكو هەر ئەوە تاكە ڕێگاكەشە و ڕێگای دووەم بوونی نییە؟ 

بەڕای من زیرەكیی سیاسیی مەسرور بارزانی و كابینەكەی لەوەدابوو، نەیانهێشت گرێبەستی وزە تەنها گرێبەستی وزە بێت، بەڵكو ڕەهەندێكی سیاسی و ستراتیژیشیان پێدا و مانەوەی یەك هەفتە لە دیدار و كۆبوونەوە لە ویلایەتە یەكگرتووەكانی ئەمەریكا تا ئاستی كەسی دووەم، گرێدانی ئەو هاوبەشیە سیاسیە بوو.

چ لۆژیكێك ئەوە قبووڵ دەكات ویلایەتە یەكگرتووەكانی ئەمەریكا ئامادەی كار و هەماهەنگی و سیاسەتی هاوبەش و وەبەرهێنانی وزە بێت لەگەڵ تۆ و لە ناوچەكەی تۆدا بەڵام تۆ بەدەم ئەم كارەوە نەچیت؟! بەڕاستی شەرمە و مایەی پێكەنینە ئەگەر كەسێك بەم لۆژیكە قسە لە سیاسەت بكات، بەكورتیەكەی ئەوە هەر سیاسەت ناكات و میدیاكارێكی سەر شاشەی مۆبایلەكانمان زیاتر شتێكی تر نییە.

باشە تۆ نایكەیت، ئەمەریكا پەكی دەكەوێت؟ هەر ئەوە عێراق خۆی مەمنوونە و وەك مۆز بۆ مەیموون هەڵبدەی ئامادەیە بۆ هەر گرێبەستێكی لەم شێوەیە لەگەڵ ئەمەریكا سەد جۆر نمایش بكات.

جا هەر ئەمانەی لەسەر شاشەی مۆبایلەكانمان، سەرقاڵی پڕكردنی مێشكی خەڵكن لە گەمژەیی، ئەگەر عێراق كارێكی لەم شێوەیە بكات و هەنگاوێكی ئاوا بنێت، دەیكەن بە دەستكەوتی سەدە و هەر لەوێوە جاڕی كۆتایی هەرێم لێدەدەن.

ئێمە بینیمان وڵاتانی كەنداو بەو هەموو پێشكەوتنەوە چۆن نەك لە سیاسەتی ویلایەتە یەكگرتووەكانی ئەمەریكا و ئیدارە نوێكەی چوونە پێشەوە، بەڵكو خواستە شەخسیەكانی دۆناڵد ترەمپیشیان تێر كرد، بۆ ئەمەش گوێیان لە یەك ویزەویز و تانە و تەشەری بێ ئیشەكان نەگرت.

هەرێمی كوردستان بە كۆی هێز و لایەنەكانییەوە، بەتەواوی ئاراستەكانییەوە، دەبێ پشتیووانی لەم هەنگاوە و هەر هەنگاوێكی لەم شێوە ستراتیژی و نیشتمانی بكات، چونكە ئەوەی ڕوودەدات پەیوەستە بە دوارۆژی میللەتەكەمانەوە و تاكە ڕێگەشە كە ئەمرۆ بۆ ئێمە ئاوەڵایە، خەڵكی دیکەش بە پارە دەیكڕن.

پاشان ئەو هێزانە مافی ئەوەیان دەبێت لە سیاسەتی هەرێمەكەدا بەشدار بن و وەك ئۆپۆزسیۆنیش چاودێریی داهات و ماڵ و سامانی گشتی و چۆنیەتی تەوزیعی عادیلانەی ئەو دەستكەوتە داراییانە بكەن.

جگە لەمە، ئەگەر تۆ دژی ئەنجامدانی گرێبەست و شەراكەتی لەگەڵ ئەمەریكا كەواتە تۆ بەرلەوەی دژایەتیی هەركەس بكەیت، دژایەتی ویلایەتە یەكگرتوەكانی ئەمەریكا و سیاسەتەكانی دەكەیت لە ناوچەكەدا، وەك لەمپەر لەبەردەمیا وەستاویت، جا ئەگەر ئەمە بەباش ئەزانیت فەرموو.