ململانێی بەهێز لەنێوان مالیکی و سوودانی لەسەر پۆستی سەرۆکوەزیران دروست دەبێت

ئاڤا نیوز

هەڵبژاردنی ئەمجارەی پەرلەمانی عێراق شەڕی سوودانی و مالیکی گەرمتر دەکات و ململانێی بەهێز دەخاتە نێوان سوودانی و مالیکی بۆ بەدەستهێنانی پۆستی سەرۆکوەزیران. چەند کەسایەتییەکی دیکەی شیعەش خۆیان بۆ ڕکابەرییەکان ئامادە کردووە.

وێنە گەورەکە: کێبڕکێ و ململانێی قورس لەنێو چوارچێوەی هەماهەنگی (هاوپەیمانێتی شیعەکان) لەسەر پۆستی سەرۆکوەزیران دروست بووە، بەپێی عورفی سیاسیش سەرۆکوەزیران دەبێت بۆ شیعە بێت.

ئەوەی پێویستە بیزانیت: سوودانی بۆ هەڵبژاردن لەلایەن هەندێک هێزی ناو چوارچێوەی هەماهەنگیی  پشتیوانی دەکرێت و هاوپەیمانێتییەکی پێکهێناوە لەگەڵ بەشێک لە سەرکردە سیاسییەکان وەک ئەیاد عەللاوی و نەسیف جاسم خەتابی، پارێزگاری کەربەلا و  فالح فەیاز، سەرۆکی حەشدی شەعبی و چەند لایەنێکی دیکە. سوودانی خۆی سەرۆک لیست دەبێ، واتە کاندیدی ژمارە یەک دەبێت.

لەبەرامبەر ئەوەدا: نووری مالکی هەر وەک هەموو هەڵبژاردنەکانی پێشوو لیستی دەوڵەتی یاسای ئامادەکردووە،  هەموو چاوێکیشی لەسەر هۆزەکان و لایەنی دەرەکی هەیە بۆ بەدەستهێنانی کورسی زیاتر.

هاوکات، مالیکی ئەزموونی کێبڕکێی لەبەغدا هەیە، پێشتر لە ساڵی 2009 بەرامبەر عەلاوی دابەزی، هەردووکیان سەرۆک لیست بوون. ئەو کات عەللاوی لە هەڵبژاردنەکە براوە بوو کە 700 هەزار دەنگی هێنا، مالیکیش 500 هەزار دەنگی هێنا، بەڵام مالیکی نەیهێشت عەلاوی ببێتە سەرۆکوەزیران.

لەهەمان کاتدا، لە هەڵبژاردنی دواتریش مالیکی بەسەر حەیدەر عەبادی بردەوە و نەیهێشت ببێتەوە سەرۆکوەزیران، هەرچەندە دوو هەڵبژاردنی دواتر لە بەغدا بە ڕەوتی سەدر  دۆڕا، بەڵام هەر نەیهێشت پۆستی سەرۆکوەزیران بۆ ئەوان بێت، دواتر سەدرییەکان وازیان لە سیاسەت هێنا و لە پرۆسەی سیاسی کشانەوە.

ئەوەی لەوبارەیەوە دەگوترێت: ئێستا مالیکی زۆر لە سوودانی تووڕەیە و دەڵێت، "سوودانی دوو کورسی هەبوو و ئێمە هێنامان کردمانە سەرۆکوەزیران، بەڵام زۆر بێوەفا بوو و پشتی تێکردین. دەشڵێت سوودانی ئێستا خەریکە هەموو هێزی حکومەت بەکاردەهێنێت بۆ ئەوەی لە هەڵبژاردن سەربکەوێت، بەڵام لەمەودوا دەبێ ڕێگربین لەوەی سەرۆکوەزیران بتوانێت حیزب دروست بکات و خۆی هەڵبژێرێت".