فایلی خەڵک؛ دانیشتووانی گوندێکی بەردەڕەش داوای نۆژەنکردنەوەی ڕێگاکەیان دەکەن

ئاڤا نیوز

دانیشتووانی گوندی خاروک لە قەزای بەردەڕەش داوای نۆژەنکردنەوەی ڕێگای گوندەکەیان دەکەن. موختاری گوندەکەش دەڵێت، بەدەست خراپیی ڕێگەکە ژیانمان نەماوە.

وێنە گەورەکە: ڕێگای گوندی خاروک  لە ناحیەی دارەتووی سەر بە قەزای بەردەڕەش، ماوەی زیاتر لە پێنج ساڵە تێکچووە و تاوەکو ئێستا قیرتاو نەکراوە، دانیشتووانی گوندەکە ناڕازین.

زانیاریی پەیامنێر: نەجات فارس، پەیامنێری ئاڤا میدیا بەدواداچوونی بۆ خراپی ڕێگای گوندەکە کردووە و لەگەڵ خەڵکی گوندەکە قسەی کردووە. خالید وەلی، دانیشتووی گوندی خاروکە و دەڵێت، "باوکم بەهۆی ڕووداوی هاتووچۆ لەسەر ئەم ڕێگا وێرانەیە گیانی لەدەستداوە".

لێدوانی فەرمی: موختاری گوندی خاروک، دەڵێت، "بە دەست خراپی ڕێگاکە ژیانمان نەماوە، تەنانەت خراپی ڕێگاکە وایکردووە، نەک خزم و کەس، بەڵکو فرۆشیارە گەڕۆکەکانیش سەردانی گوندەکەمان ناکەن".

لەلایەکی دیکەوە: تەحسین عیسمەت، بەڕێوەبەری ناحیەی دارەتوو دەڵێت: لە دوای جەژن قۆناغی یەکەمی نۆژەنکردنەوەی ڕێگاکە دەستپپێدەکات.

- درێژی ڕێگای گوندی خاروک، حەوت کیلۆمەترە، وابڕیارە بە دوو قۆناغ نۆژەن بکرێتەوە و لە دوای جەژنی قوربانیش، کارەکانی دەستپێبکەن.