دوو تیمی هەرێمی کوردستان لە پێشبڕکێیەکی نێودەوڵەتی سێیەم دەبن

ئاڤانیوز

لە پێشبڕکێیەکی نێودەوڵەتی لە وڵاتی چین، دوو تیمی هەرێمی کوردستان بە نوێنەرایەتیی عێراق و ڕۆژهەڵاتی ناوەڕاست پلەی سێیەمیان بەدەستهێنا و مامۆستایەکی زانکۆی سەڵاحەددینیش لە ئاستی مامۆستایان پلەی یەکەمی بەدەستهێنا.

چیرۆکی سەرەکی: پێشبڕکێی ساڵانەی هواوی (Huawei ICT Competition 2025) کە ڕۆژی 20 تا 24ـی ئایاری 2025 لە وڵاتی چین بەڕێوەچوو، دوو تیمی هەرێمی کوردستان کە پێکهاتبوو لە پێنج قوتابی و دوو مامۆستای زانکۆ، توانییان لەسەر ئاستی هەردوو پێشبڕکێی تەکنەلۆجیاکانی (Cloud) و (Computing) پلەی سێیەم لەسەر ئاستی جیهان بەدەستبهێنن، مامۆستایەکی زانکۆی سەڵاحەدینیش لە تاقیکردنەوەی مامۆستا بەشداربووەکان پلەی یەکەمی بەدەستهێنا.

لێدوانی فەرمی: د. ماردین عەبدوڵڵا، بەرپرسی ئەکادیمی هواوی لە عێراق بە ئاڤامیدیا گوت: دوو تیمی عێراق کە لە پێشبڕکێیەکە پلەی سێیەمیان بەدەستهێنا پێکهاتبوون لە پێنج قوتابی و دوو مامۆستا، سەرجەمیان لە زانکۆکانی هەرێمی کوردستان بوون، مامۆستایەکی زانکۆی سەڵاحەددینیش لە پێشبڕکێی مامۆستا بەشداربووەکان پلەی یەکەمی بەدەستهێنا.

لەلایەکی دیکەوە: ڕەسوڵ لەتیف عەبدولڕەحمان یەکێک لە قوتابییە بەشداربووەکانی پێشبڕکێیەکە بە ئاڤامیدیای گوت: لە تاقیکردنەوەی گەیشتن بەم پێشبڕکێیە لە سێ تاقیکردنەوەی جیا لە ئاستی عێراق، ڕۆژهەڵاتی ناوەڕاست و وڵاتانی ئاسیای ناوەڕاست، توانیمان پلەی یەکەم بەدەستبهێنین، لە قۆناغی چوارەم و لەسەر ئاستی جیهانیش لەگەل تیمەکەم پلەی سێیەممان بەدەستهێنا.

ئەوەی پێویستە بیزانیت: لە پێشبڕکێیەکە 120 تیم لە 40 وڵاتی جیهان بەشدارییان کردبوو، 360 قوتابی و 15 مامۆستا کێبڕکێیان دەکرد.