ماددەی هۆشبەر لە جۆرێکی شیرینی منداڵاندا دەدۆزرێتەوە

ئاڤا نیوز

بەهۆی دۆزینەوەی ماددەی هوشبەر لەنێو جۆرێکی شیرینی منداڵان، کۆمپانیای ئەڵمانی بەرهەمهێنەری شیرینی هاریبۆی منداڵان بەرهەمەکەی لە بازاڕەکانی هۆڵەندا دەکشێنێتەوە.

وێنە گەروەکە: شیرینی هارێبۆ، بەتایبەت شێوە کۆکاکۆلاکەی کە بە هەپی کۆلا بەنێوبانگە، ماددەی هۆشبەری تێدا دۆزرایەوە، کۆمپانیای ئەڵمانی هاریبوو بەرهەمەکەی لە بازاڕەکانی هۆڵەندا کشاندەوە.

هۆکارە زانراوەکان: ئاشکرابوون و دۆزینەوەی ئەم ماددە هۆشبەرەیە لە شیرینی منداڵان دوای ئەوە هات کە منداڵێک خواردوویەتی و توشی گێژبوون و تاڕادەیەک نیمچە بێهۆشبوونێک ببوو، ئەویش دوای گەیاندنی بە نەخۆشخانە دایک و باوکی منداڵەکە هاریبۆکەیان بردووە بۆ بنکەی پۆلیسی ناوچەکە و تاقیکردنەوەی کراوە دەرکەوتووە کە ماددەی هۆشبەری (حەشیش)ی تێدا بووە.

ڕاگەیێنراوی فەرمی: پۆلیسی هۆڵەندا ڕایگەیاند: تائێستا نەزانراوە کە چۆن ماددەی هۆشبەر تێکەڵ بەو شیرینییەی منداڵان کراوە، بەڵام لێکۆڵینەوە لەم کەیسە دەستیپێکردووە.

لەلایەکی دیکەوە: پاتریک تاکس، جێگری بەبازاڕکردنی هاریبۆ ڕایگەیاند، چەند پاکەتێکی دیاریکراو لەو ماددەیە تێکەڵ بە شیرینی هاریبۆ کراوە، بەڵام ئێمە بەدواداچوونی زۆر ورد بۆ ئەم بابەتە دەکەین، چونکە تەندروستی بەکاربەرەکانمان، بەتایبەت تەندروستی منداڵانمان  لە پێشینەی کارەکانمانە.