لە ڕۆژێکدا 18 بەنزینخانە لە شەقڵاوە داخران

ئاڤا نیوز

وەزارەتی سامانە سرووشتییەکان سزای سەر بەنزینخانەکان قورستر دەکات و لەماوەی یەک ڕۆژیشدا 18 بەنزیخانە لە سنووری قەزای شەقڵاوە داخران.

چیرۆکی سەرەکی: تیمەکانی پشکنین لە بەڕێوەبەرایەتی نەوت و کانزاکانی هەولێر ڕۆژانە سامپڵی 40 بەنزینخانە دەبەنە تاقیگە ئەگەر کوالێتی پێکهاتەکانی بەنزین هاوتای ستاندارد نەبێت، بەنزیخانەکان ڕووبەڕووی سزای پێ بژاردن و داخستن دەبنەوە.

زانیاریی بەدەستهاتوو: لەماوەی یەک ڕۆژی بەدواداچووندا لە سنووری قەزای شەقڵاوە، لەکۆی 30 بەنزینخانە، 18 بەنزیخانە بەهۆی خراپی بەنزینەکەیان داخران و سزای پێبژاردنیان بەسەردا سەپێنرا.

لەلایەکی دیکەوە: بەهۆی زۆری ژمارەی سەرپێچی بەنزینخانەکان، وەزارەتی سامانە سرووشتییەکان بڕیاردا سزاکان قورستر بکات، لەمەودوا هەر بەنزینخانەیەک لە ساڵێکدا سێ جار سەرپێچی بکات، ماوەی سێ مانگ دادەخرێت و سەرووی پێنج ملیۆن دینار سزای دارایی دەدرێت، سزای داراییش دوو هێندە کراون و لە 500 هەزارەوە دەست پێدەکات.