لە هەولێر شۆفێرێک بەهۆی نمایشکردن لەبەردەم نەخۆشخانەیەک دەستگیر کرا

ئاڤا نیوز

 

هاتووچۆی هەولێر ئاشکرای دەکات کە شۆفێری ئەو ئۆتۆمبێلە دەستگیر کرا کە ئەمڕۆ لەبەردەم نەخۆشخانەی فریاکەوتنی ڕۆژئاوای شاری هەولێر سەرپێچی و نمایشی دەکرد.

 

چیرۆکی فەرمی: ئەمڕۆ ڤیدیۆی نمایشی ئۆتۆمبێلێک لە تۆڕە کۆمەڵایەتییەکانی بڵاوکرایەوە و دواتر دەرکەوت کە شوێنی نمایشەکە بەردەم نەخۆشخانەی فریاکەوتنی ڕۆژئاوای هەولێرە، ئەمەش ناڕەزایی زۆری لێکەوتەوە.

 

لێدوانی فەرمی: عەقید هێمن ئەمین، گوتەبێژی هاتووچۆی هەولێر بە ئاڤا میدیای ڕاگەیاند: بەرەبەیانی ئەمڕۆ دووشەممە 2-6-2025، ئۆتۆمبێلێک لەبەردەم نەخۆشخانەی فریاکەوتنی ڕۆژئاوای هەولێر، نمایشی بە ئۆتۆمبێلەکەی کردووە و دانیشتووانی گەڕەکەکە و نەخۆشخانەکەی هەراسان کردووە.

 

- دوای بڵاوبوونەوەی ڤیدیۆیەکە دەستبەجێ بەدواداچوون کرا و شۆفێرەکە دەستگیر کرا و دەستیش بەسەر ئۆتۆمبێلەکەیدا گیرا، هاوکات شۆفێرەکە سزای داراییش دەدرێت.

- شۆفێرەکە بە نەتەوە عەرەبە و ژمارەکەی بەغدایە و دانیشتووی شاری فەلوجەیە و بۆ گەشت هاتووەتە شاری هەولێر، لە کاتی دەستگیرکردنی گوتویەتی نەمزانیوە لە هەولێر ئەم جۆرە نمایشە قەدەغەیە، چونکە لای ئێمە ئاساییە.