چوارچێوەی هەماهەنگی سەبارەت بە ناکۆکیی هەولێر و بەغدا: بەپێی دەستوور و یاسا مامەڵە بکرێت

ئاڤا نیوز

 

هاوپەیمانیی چوارچێوەی هەماهەنگی داوا دەکات ناکۆکییەکانی نێوان هەرێمی کوردستان و بەغدا بەپێی دەستوور و یاساکان چارەسەر بکرێت.

   
چیرۆکی سەرەکی: ئێوارەی ڕۆژی دووشەممە، چوارچێوەی هەماهەنگی کۆبوونەوەی ئاسایی خۆی لە نووسینگەی عەممار حەکیم، ڕێبەری ڕەوتی حیکمەی نیشتمانی ئەنجامدا، محەممەد شیاع سوودانی، سەرۆکوەزیرانی عێراقیش ئامادەبوو، ڕەوشی سیاسی، خزمەتگوزاری و هەڵبژاردن گفتوگۆیان لەسەر کرا.

 

ڕاگەیێنراوی فەرمی: بەگوێرەی ڕاگەیێنراوی هاوپەیمانیی چوارچێوەی هەماهەنگی سەبارەت بە پێشهاتەکانی پەیوەست بە هەرێمی کوردستان و  عێراق، چوارچێوەی هەماهەنگی داوایکرد بەپێی دەستوور و یاسا کارپێکراوەکان مامەڵە لەگەڵ پرسە نیشتمانییەکان بکرێت. هاوکات جەختیشی لە پەرۆشی حکومەتی فیدراڵی بۆ مافی سەرجەم هاووڵاتییان و هەوڵی ڕژد بۆ لابردنی هەموو ئاستەنگەکان کردەوە.

 

چوارچێوەی هەماهەنگی جەختی لە پێویستیی دەرکردنی یاسای نەوت و گاز لەلایەن ئەنجوومەنی نوێنەران کردەوە و بە کرۆکی چارەسەری کێشە هەڵپەسێردراوەکانی نێوان بەغدا و هەولێری دانا.

 

گۆشەیەکی دیکەی دیمەنەکە: لەبارەی پرسی هەڵبژاردنەوە، چوارچێوەی هەماهەنگی دووپاتی کردەوە کە هەڵبژاردن لە کاتی دیاریکراوی خۆیدا ئەنجام بدرێت، داواشی لە هاووڵاتییان کرد، کارتی دەنگدانی بایۆمەتری نوێ بکەنەوە و بەشدارییەکی فراوان و کاریگەر و هۆشیارانە لە هەڵبژاردندا بکەن، هۆشداریشی دا، لە بەکارهێنانی 'پارەی دەوڵەت' بۆ کاریگەری خستنە سەر ڕای گشتی.