سەرۆکی ئەمریکا و چین پەیوەندییەکی تەلەفۆنی ئەنجام دەدەن

ئاڤا نیوز

 

وتەبێژی کۆشکی سپی ڕایدەگەیێنێت، ئامادەکاریی دەکرێت بۆ ئەوەی هەفتەی داهاتوو پەیوەندییەکی تەلەفۆنی لە نێوان سەرۆکی ئەمریکا و چین ئەنجام بدرێت.

 

وێنە گەورەکە: پەیوەندییەکانی نێوان چین و ئەمریکا مێژوویەکی دێرینیان لە ناکۆکی و کێبڕکێی سیاسی و بازرگانی هەیە، لەگەڵ دەستپێکردنی خولی دووەمی سەرۆکایەتیی دۆناڵد ترەمپ، گەورەترین جەنگی بازرگانی لە نێوان ئەمریکا و چین دەستی پێکرد، لە بەرامبەر بڕیاری ترەمپ بۆ بەرزکردنەوەی ڕێژەی باجی گومرکی بۆ 145% لەسەر بەرهەمە چینییە هاوردەکراوەکان، وەڵامدانەوەی پەکین بریتی بوو لە بەرزکردنەوەی پێناسی گومرکی بە ڕێژەی 125% بۆ سەر بەرهەمە ئەمریکییەکان، ئەم بڕیارانەش هێندەی دیکە ناکۆکی نێوان هەردوو دەوڵەتی قووڵتر کردەوە.

 

لێدوانی فەرمی: کارۆلین لیڤیت، وتەبێژی کۆشکی سپی بە میدیاکارانی ڕاگەیاند، ئامادەکاریی دەکرێت بۆ ئەوەی هەفتەی داهاتوو گفتوگۆیەک لە ڕێگەی پەیوەندی تەلەفۆنییەوە لە نێوان دۆناڵد ترەمپ، سەرۆکی ئەمریکا و شی جینپینگ، سەرۆکی چین بەڕێوەبچێت، گفتووگۆ لەسەر پەیوەندییە بازرگانییەکانی نێوان هەردوو وڵات دەکرێت.

 

زانیاریی زیاتر: وتەبێژی کۆشکی سپی وردەکاریی زیاتری سەبارەت بە پەیوەندییە تەلەفۆنییەکە نەخستەڕوو، هەروەها تاوەکو ئێستا پەکینیش هیچ لێدوانێکی سەبارەت بە پەیوەندیی تەلەفۆنی نێوان هەردوو سەرۆک ڕانەگەیاندووە.

 

ئەوەی پێویستە بیزانیت: لە دواین هەنگاودا ئیدارەی ترەمپ پلانی ئەوەی هەیە بە فشار خستنەسەر چەند دەوڵەتێک چوارچێوەی بازرگانی لەگەڵ چین کەم بکاتەوە، پەکینیش هۆشداری تووند بە واشنتن دەدات و ڕایگەیاند، بە هیچ شێوەیەک ڕێگە بە هیچ هەنگاوێك نادەین بۆ بەرتەسکردنەوەی توانای بازرگانی چین و وەڵامی توندمان بۆ ئەمریکا و هەر دەوڵەتێکی دیکە دەبێت لە ئەگەری جێبەجێکردنی پلانێکی لەو جۆرە.