دوای جەژن 38 هەزار پارچە زەوی لە سنووری پارێزگای هەولێر دابەش دەکرێن

ئاڤا نیوز

 

بەڕێوەبەرایەتیی گشتیی شارەوانیەکانی هەولێر سەبارەت دابەشکردنی زەوی لە سنوورەکەیان ئامادەکاریی تەواوی کردووە و دەڵێت، "چاوەڕێی گەڕانەوەی بەشی سێیەمی ناوەکان دەکەین لە وەزارەت و ڕاستەوخۆ دوای ئەوە دەست بە دابەشکردنی زەوییەکان دەکرێت."

 

وێنە گەورەکە: بەڕێوەبەرایەتیی گشتیی شارەوانیەکانی هەولێر، شەقڵاوە، هەریر، پیرمام، بنەسڵاوە، بەحرکە، عەنکاوە، قوشتەپە، خەبات و کۆیە لەخۆدەگرێت تاوەکو ئێستا 42 هەزار فۆڕمی پەسەندکراویان بەدەست گەیشتووە، دوای جەژن دەست بە دابەشکردنیان بەسەر سوودمەندبووان دەکرێت.

 

لێدوانی فەرمی: مەریوان حاکم هادی، بەڕێوەبەری گشتیی شارەوانیەکانی هەولێر بە ئاڤای گوت، "38 هەزار پارچە زەوی لە سنووری شارەوانییەکانی گشتیی هەولێر ئامادەکراون، دوای گەڕانەوەی بەشی کۆتایی ناوەکان دەست بە تیروپشک دەکەین."

 

ئەمەش بزانە: لە سنووری شارەوانیی کۆیە نزیکەی نۆ هەزار فەرمانبەر و خانەنشین لە پرۆسەی وەرگرتنی زەوی سوودمەند دەبن، بەڵام تاوەکو ئێستا هیچ ئامادەکارییەک بۆ دەستپێکردنی پرۆسەکە نەکراوە.