چێشتخانەی گۆرانیبێژێکی میللی لە سلێمانی دادەخرێت؛ پابەندی مەرجە تەندروستییەکان نەبووە

ئاڤا نیوز

 

چێشتخانەی گۆرانیبێژی میللی، عومەر میشیاوی لە سلێمانی بەهۆی نەبوونی مەرجە تەندروستییەکانەوە داخرا و ڕووبەڕوووی لێپێچینەوەی یاسایی دەکرێتەوە.

 

چیرۆکی سەرەکی: ئەمڕۆ یەکشەممە 8-6-2025، بەهۆی پابەندنەبوون بە مەرج و ڕێنماییەکانی کارکردن، لیژنە هاوبەشەکانی قائیمقامیەتی سلێمانی ڕێستۆرانت و چێشتخانەی گۆرانیبێژی میللی "عومەر میشیاوی"یان لە گەڕەکی بەکرەجۆی شاری سلێمانی داخست.

 

لێدوانی فەرمی: گۆران قادر، سەرۆکی لیژنە هاوبەشەکانی سلێمانی بە ئاڤای ڕاگەیاند: شوێنەکە پابەندی مەرجەکانی تەندروستی و ڤێتێرنەری و ڕێنماییەکانی دیکەی کارکردن نەبووە، بۆیە داخراوە و خاوەنەکەی ڕووبەڕووی ڕێکاری یاسایی دەکرێتەوە.

 

زانیاریی زیاتر: یەکێکی دیکە لە سەرپێچییەکانی چێشتخانەکە، نەبوونی مۆڵەتی کارکردنە، پێویستە شوێنەکە و ئەو کارمەندانەی کاری تێدا دەکەن مۆڵەت لە لایەنە پەیوەندیدارەکان وەربگرن.