ئیسرائیل پێگە دیپلۆماسییەکانی لە وڵاتانی جیهان دادەخات

ئاڤا نیوز

 

لە ترسی كاردانەوەكان لە دژی هێرشكردنە سەر ئێران، ئیسرائیل پێگە و ناوەندە دیپلۆماسییەكانی لە وڵاتانی جیهان دادەخات.

 

چیرۆكی سەرەكی: ئیسرائیل بەرەبەیانی ئەمڕۆ هەینی هێرشێكی فراوانی ئاسمانی بۆ سەر ئێران دەستپێكرد و دەیان شوێنی ستراتیژی و كەسایەتی سەربازی و زانای ئەتۆمی لە چەند ناوچەیەكی ئەو وڵاتە كردە ئامانج. پێشنیوەڕۆش شەپۆڵی دووەمی هێرشەكانی ئەنجامدا و كەمێك لەمەوبەریش شەپۆڵی سێیەمی هێرشەكانی دەستپێكرد.

 

ڕاگەیێنراوی فەرمی: وەزارەتی دەرەوەی ئیسرائیل لە پەیامێکدا باڵیۆزخانەکانی خۆی لە ئەمریکا، بەریتانیا، سوید، نەرویژ، ئەڵمانیا، نەیجیریا، ڕووسیا، ئۆکرانیا و فەرەنسا ئاگادار كردووەتەوە، كە لەبەر ڕۆشنایی پێشهاتەکانی ئەم دواییە، نوێنەرایەتییەکانی ئیسرائیل لە سەرانسەری جیهان دادەخرێن و خزمەتگوزاری کونسوڵگەری پێشکەش ناکرێت.

 

زانیاریی بەدەستهاتوو: باڵیۆزخانەی ئیسرائیل لە سوێد، لە ڕاگەیێنراوێكدا ئاماژەی بەوە كردووە، بە لەبەرچاوگرتنی گۆڕانکارییەکان، ئیسرائیل نێردە و دامەزراوە دیپلۆماسییەکانی لە وڵاتانی جیهان دادەخات، ئەمەش لەپێناو پاراستنی كارمەند و نێردە دیپلۆماسییەكانی لەلایەك و ڕێگریكردن لە دروستبوونی هەر جۆرە گرژییەك.