دوای بانگەوازەکەی چوارچێوەی هەماهەنگی خۆپیشاندان لە بەغدا دژی ئیسرائیل دەکرێت

ئاڤا نیوز

ئێوارەی یەکشەممە، هاوپەیمانیی چوارچێوەی هەماهەنگیی شیعەکان کۆبووەوە و داوای خۆپیشاندانی لە هاووڵاتییان کرد بۆ پشتیوانیکردنی ئێران دژی ئیسرائیل، بڕیارە ئێوارەی ئەمرۆ لە ناوەڕاستی بەغدا خۆپیشاندانەکە بکرێت.

چیرۆکی سەرەکی: بۆ ماوەی چوار ڕۆژە شەڕی نێوان ئیسرائیل و ئێران بەردەوامە، چوارچێوەی هەماهەنگی کە پێکهێنەری سەرەکی حکومەتی عێراقە و نزیکە لە ئێران پشتیوانیی خۆی بۆ ئێران دەربڕیوە و داوای پشتیوانیکردنی ئەو وڵاتە دەکات.

زانیاریی بەدەستهاتوو: بەگوێرەی زانیارییەکانی ئاڤا میدیا لایەنگرانی گرووپە چەکدارەکانی سەر بە ئێران و بەشێک لە حیزبە سیاسییەکانی شیعە لە عێراق ئەمڕۆ دووشەممە لە کاتژمێر 5ـی ئێوارە لە ناوچەی جادرییە لە بەغدا خۆپیشاندان دەکەن بۆ پشتگیرکردنی ئێران دژی هێرشەکانی ئیسرائیل.

باکگراوند: شەوی ڕابردوو، سەرکردەکانی چوارچێوەی هەماهەنگی بە ئامادەبوونی محەممەد شیاع سوودانی، سەرۆکوەزیرانی عێراق کۆبوونەوە، سەرکۆنەی دەستدرێژییەکانی ئیسرائیلی بۆ سەر ئێران کرد هاوکات داوای خۆپیشاندانی کرد بۆ پشتیوانیکردنی ئێران.