ئێران هێرشی کردە سەر بنکەیەکی سەربازیی ئەمریکا لە عێراق

ئاڤا نیوز

 

ئێران لە تۆڵەی هێرشی ئاسمانی ئەمریکا بۆ سەر وێستگە ئەتۆمییەکانی، ئێوارەی ئەمڕۆ بە شەش مووشەکی بالسیتی هێرشی کردە سەر بنکە سەربازییەکانی ئەمریکا لە عێراق و قەتەر. 

 

زانیاریی بەدەستهاتوو: کەمێک پێش ئێستا میدیای ئیسرائیلی بڵاویکردەوە، ئێران هێرشی مووشەکی بۆ سەر بنکە سەربازییەکانی عێراق دەستپێکردووە.

 

بەشێک لە میدیاکانی بڵاویانکردووەتەوە: هێرشی مووشەکی ئێران بۆ سەر بنکەی سەربازی ئەمریکا بووە لە عەین ئەسەد لە ئەنبار کراوە. 

هەر ئێستا میدیاکانی ئیسرائیل بڵاویانکردووەتەوە: زەنگی ئاگادارکردنەوە لە بەحرەین و کوێت و دەوحەی پایتەختی قەتەر لێدەدرێت و سیستیمی بەرگری دژە مووشەکی عەدید بەرپەرچی هێرشە مووشەکییەکان دەداتەوە. 

لێدوانی فەرمی: لەبارەی دەنگۆی کەوتنە خوارەوەی مووشەک لە هەریر، شێروان جەلام، قائیمقامی هەریر بە ئاڤای ڕاگەیاند: هەموو ئەو دەنگۆیانە ڕەتدەکەینەوە کە لە سۆشیاڵ میدیا بڵاوکراوەتەوە و دەنگۆی بەئامانجگرتنی بنکەی پێشووی سەربازیی ئەمریکا لە فڕۆکەخانەی هەریر دوورە لەڕاستییەوە.

ئەوەی ئێستا ڕوودەدات: میدیا عێراقییەکان بڵاویانکردووەتەوە بەهۆی ئەو پێشهاتە لەناکاوەی ئێستا هاتووەتە ئاراوە، فڕۆکەخانەی نێودەوڵەتیی بەسرە گەشتە ئاسمانییەکانی بەشێوەیەکی کاتی ڕاگرتووە.