ئەمریکا نیگەرانی خۆی لە تێپەڕاندنی یاسای حەشدی شەعبی دووپات دەکاتەوە

ئاڤا نیوز

ئەمریکا بە فەرمی نیگەرانیی قووڵی خۆی سەبارەت بە پێشنیازەیاساکانی تایبەت بە هێزەکان و دەستەی حەشدی شەعبی بە سەرۆکایەتیی پەرلەمانی عێراق ڕاگەیاند و هۆشداری دا لەوەی کە دەرکردنی یاسایەکی لەو شێوەیە دەبێتە هۆی "چەسپاندنی هەژموونی ئێران" و "بەهێزکردنی گرووپە تیرۆریستییە چەکدارەکان"، کە هەڕەشە لە سەروەریی عێراق دەکات.

چیرۆکی سەرەکی: ئەمڕۆ یەکشەممە ستیڤن فەیگن، هەڵسوڕێنەری باڵیۆزخانەی ئەمریکا لە بەغداد و موحسین مەندەلاوی، جێگری یەکەمی سەرۆکی ئەنجومەنی نوێنەرانی عێراق، کۆبوونەوە.

ڕاگەیێنراوی فەرمی: بەگوێرەی ڕاگەیەندراوێکی باڵیۆزخانەی ئەمریکا لە بەغداد، فەیگن نیگەرانییەکانی وڵاتەکەی دووپاتکردووەتەوە، کە پێشتریش لەلایەن مارکۆ ڕۆبیۆ، وەزیری دەرەوەی ئەمریکا بە سەرۆکوەزیرانی عێراق ڕاگەیەندرابوو. واشنتن پێیوایە دەرکردنی یاساکە بە شێوەی ئێستای، ڕێگە بۆ زیادبوونی دەسەڵاتی ئێران و ئەو گرووپانە خۆش دەکات کە هەڕەشەن بۆ سەر سەقامگیریی عێراق و ناوچەکە.

لەلایەکی دیکەوە: نووسینگەی ڕاگەیاندنی مەندەلاوی لە ڕاگەیێنراوێکدا ئاماژەی بەوەدا کە لە دیدارەکەدا گفتوگۆ لەبارەی "دوایین پێشهاتەکانی گۆڕەپانی ناوخۆیی و ناوچەیی و ژمارەیەک دۆسیەی جێی بایەخی هاوبەش" کراوە، بەبێ ئەوەی ئاماژە بە نیگەرانییە تایبەتەکانی ئەمریکا بکات سەبارەت بە یاسای حەشدی شەعبی بدات.

ئەوەی پێویستە بیزانیت: ئەم هەڵوێستە ئاشکرایەی ئەمریکا لە کاتێکدایە کە مشتومڕێکی زۆر لەناوخۆی عێراقدا لەسەر هەموارکردنەوەی یاسای حەشدی شەعبی هەیە، کە ئامانج لێی ڕێکخستنەوەی پێکهاتە و دەسەڵاتەکانیەتی لە چوارچێوەی سیستمی بەرگریی وڵاتدا. شیکەرەوان پێیانوایە ئەم گوشارە دیپلۆماسییەی ئەمریکا کاریگەریی ڕاستەوخۆی لەسەر دواخستنی دەنگدان لەسەر یاساکە دەبێت لە پەرلەمان.