پەتاتەی كوردستان لەلایەن براندە جیهانییەكانەوە بەكاردەهێنرێت

ئاڤا نیوز

بەرهەمهێنەرێکی کشتوکاڵی ئاشکرای دەکات، کوالێتی بەرهەمی پەتاتەی کوردی بەجۆرێک بەرزە، کە چێشتخانە براندەکانی جیهان، هاوشێوەی کەی ئێف سی و ماکدۆناڵز بەکاریدەهێنن.

چیرۆکی سەرەکی: زیاتر لە سێ ساڵە پەتاتەی بەرهەمهێنراوی هەرێمی کوردستان هەناردەی دەرەوەی وڵات و بەتایبەت بۆ وڵاتی کەنداو دەکرێت، بەهۆی باشیی جۆر و کوالێتییەکەی، خواستێکی زۆری لەسەرە.

لێدوانی فەرمی: بەشار موشیر ئاغا، بەرهەمهێنەری کشتوکاڵی میوانی مۆری ئاڤا بوو، ئاماژەی بەوەکرد، کوالێتی بەرهەمی پەتاتەی کوردستان بەجۆرێک بەرزە کە لە بەرهەمی زۆربەی وڵاتان باشترە،ئەوەش دوای شارەزاکردنی جووتیارانی کورد بە ئەزموونی پسپۆڕانی وڵاتی هۆڵەندا لەبواری بەرهەمهێنانی کشتوکاڵی.

بەشار ئاغا باسی لەوەشکرد، تەنانەت ڕێستورانتە براندەکانی جیهان لە وڵاتانی قەتەر و ئیماڕات، پەتاتەی بەرهەمهێنراوی هەرێمی کوردستان بەکاردەهێنن، لەوانەش: کەی ئێف سی و ماکدۆناڵز، ئەوەش دوای تێستکردنی بەگوێرەی پێوەر و ستاندەرە نێودەوڵەتییەکان.

ڕوونیشی کردەوە، سەرەڕای لە دەروازە سنوورییەکان و بازگە ئەمنییەکانی عێراق، ئاستەنگی زۆر بۆ گواستنەوەی بەرهەمی هەرێمی کوردستان بۆ دەرەوەی وڵات دروست دەکرێت و ئەو ئاستەنگیانە وایکردووە، تێچووی گواستنەوەی زۆر بێت، بەڵام بەهۆی داواکاریی زۆری بازرگانانی کشتوکاڵی لە وڵاتی کەنداو، لە هەناردەکردنی پەتاتە بۆ دەرەوە بەردەوامین.