کۆمیسیۆن 542 کاندید لە کێبەرکێی هەڵبژاردن دوور دەخاتەوە

ئاڤا نیوز

کۆمیسیۆنی باڵای سەربەخۆی هەڵبژاردنەکان دوورخستنەوەی 542 کاندیدی لە کێبەرکێی هەڵبژاردنی پەرلەمانی عێراق ڕاگەیاند، لەو ژمارەیەش 253 کاندیدیان بەهۆی تۆمەتی پەیوەندییان بە حیزبی بەعسەوە لە هەڵبژاردن بێبەشکراون.

وێنە گەورەکە: بڕیارە لە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بکرێت، لەچوارچێوەی ڕێکارەکانی بەر لە هەڵبژاردنیش، کۆمیسیۆن تاوەکو ئێستا ژمارەیەک کاندیدی بەهۆکاری جیاجیا لە کێبڕکێکە دوورخستووەتەوە.

لێدوانی فەرمی: عیماد جەمیل، ئەندامی تیمی ڕاگەیاندن لە کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، تا ئێستا 542 کاندید لە کێبەرکێی هەڵبژاردن دوورخراونەتەوە، لەو ژمارەیەش 253 کاندیدیان بەهۆی تۆمەتی پەیوەندییان بە حیزبی بەعسەوە لە هەڵبژاردن بێبەش کراون، 100 کاندیدی دیکەش بەهۆی نەبوونی پێوەرەکانی کاندیدبوونەوە دوورخراونەتەوە.

ئاماژەی بەوەشکردووە، چوار کاندید بەهۆی ساختەکردنی بڕوانامەکانیان و 15 کاندیدی دیکەش لەلایەن ئەنجوومەنی باڵای دادوەرییەوە دوورخراونەتەوە، زیاتر لە 160 کاندیدیش بەهۆکاری جیاواز بە کاندیدی دیکە ئاڵوگۆڕکراون.

باکگراوند: پێشتریش کۆمیسیۆنی باڵای سەربەخۆی هەڵبژاردنەکانی عێراق ڕایگەیاندبوو، سەرەتای مانگی تشرینی یەکەمی ئەمساڵ لیستی کۆتایی ناوی کاندیدەکان بۆ بەشدارییکردن لە هەڵبژاردنی پەرلەمانی عێراق پەسەند دەکات.