سوپای عێراق ڕێگری لە دروێنەکردنی جووتیارانی سنووری کەرکووک دەکات

ئاڤا نیوز

 

نوێنەری جووتیارانی سەرگەڕان بە ئاڤا نیوزی ڕاگەیاند، بەبڕیاری فەرماندەی فیرقەی هەشتی سوپای عێراق، ڕێگری لە جووتیارانی گوندی سەرگەڕان و دروێنەی بەرهەمەکانیان دەکرێت.

 

وێنە گەورەکە: جووتیارە کوردەکان سەدان ساڵە لە زەوییەکانیان کاری دروێنە دەکەن، بەڵام لە سەردەمی ڕژێمی بەعس گرێبەست بۆ عەرەبە هاوردەكان کراوە بۆ خاوەندارێتی ئەو زەوییانە، سکاڵا لای سوپای عێراق دەکەن، بەوەی جووتیارە کوردەکان لەسەر زەویی ئەوان کشتوکاڵیان کردووە و بەمەش ڕێگری لە دروێنەی جووتیارە کوردەکان دەکرێت.

 

لێدوانی فەرمی: محەممەد ئیسماعیل، نوێنەری جووتیارانی سەرگەڕان بە ئاڤا نیوزی ڕاگەیاند، "ساڵانە ئەم کارەی سوپای عێراق دووبارە دەبێتەوە،  کە زەوییەکە دەکێڵین هیچ هەڵوێستیان نییە، کە بەروبوومەکان پێدەگەن، ئینجا ڕێگری لە دروێنەی دەکەن".

 

ئەوەی پێویستە بیزانیت: لە سنووری سەرگەڕان 42 گوند هەیە، لەدوای 16ـی ئۆکتۆبەرەوە لەهەر پێنج گوندی شەناغە، پەلکانە، سەربەشاخ، گابەرەکە و خەرابە سوپای عێراق دەچێتە سەر زەوییەکانی جووتیاران و ڕێگریان لێدەکەن.