وەزیری پەروەردە: تەرخانکردنی دارایی وانەبێژانمان گەیاندە سوودانی

ئاڤا نیوز

وەزیرانی پەروەردەی هەرێمی كوردستان و عێراق لەگەڵ سەرۆكوەزیرانی عێراق كۆبوونەوە. وەزیری پەروەردەی هەرێمی كوردستان ڕایگەیاند "لیستی مامۆستایانی وانەبێژیان ڕادەستی سەرۆكوەزیرانی عێراق كردووە و چاوەڕێی وەڵامن".

بۆچی گرنگە: ماوەیەکە وانەبێژانی هەرێمی کوردستان چاوەڕوانی چارەسەری کێشەکانیانن و سەرۆکوەزیران بارزانیش وەزیری پەروەردەی ڕاسپارد تاوەکو ئەم کەیسە ڕاستەوخۆ بباتە بەغدا بۆ چارەسەر.

ئەوەی پێویستە بیزانیت: لە كۆبوونەوەكەدا وەزیری پەروەردەی حكومەتی هەرێمی كوردستان، لەبارەی لیستی مامۆستایانی وانەبێژ و تەرخانی داراییان و  پشكی هەرێمی كوردستان لە دروستكردنی باڵەخانەی قوتابخانەكاندا قسەی كردووە.

لێدوانی فەرمی: ئالان حەمەسەعید، وەزیری پەروەردەی حكومەتی هەرێمی كوردستان بە ئاڤا نیوزی گوت:"هەنگاوی پێویستمان ئەنجام داوە و چاوەڕوانی ئەنجام و وەڵامی فەرمی حکومەتی عێراقی فیدراڵین".

زانیاریی زیاتر: سەبارەت بە خوێندنی قوتابخانەکانی  فیدراڵ لە هەرێمی کوردستان و بەردەوامبوونی خوێندنیان، وەزیری پەروەردە گوتی: "هاریکاری و هەماهەنگیی خۆمان بۆ بەردەوامی پڕۆسەی خوێندنی قوتابیانی ئەو قوتابخانانە نیشان دا".