سێ خانمە هونەرمەندی کورد لە فێستیڤاڵێکی نێودەوڵەتی خەڵات کران

ئاڤا نیوز

 

هەرسێ خانمە هونەرمەندی کورد گەزیزە عومەر، فرمێسک مستەفا و نیگار حەسیب لە فێستیڤاڵی شانۆیی ئیزیس خەڵاتی ڕێزلێنانیان پێ بەخشرا.

 

ئەوەی پێویستە بیزانیت: هەرسێ خانمە هونەرمەندەکە بەشدارییان لە دووەمین خولی شانۆیی ئیزیس کرد کە تایبەت بوو بە پرسی ژن لە جیهاندا و لەلایەن ژمارەیەک خانمە هونەرمەندی وڵاتی میسرەوە بەڕێوە چوو.

 

لێدوانی فەرمی: دکتۆر نیگار حەسیب قەرەداغی لەبارەی فێستیڤاڵەکەوە بە ئاڤانیوزی گوت: لە فیستیڤاڵەکەدا چەند توێژینەوەیەک پێشکەش کران،  نووسەر و هونەرمەند گەزیزە عومەر توێژینەوەیەکی بە ناوونیشانی "کاریگەریی جەنگ لەسەر نووسینی دەقی شانۆیی" پێشکەش کرد، من  بە شانۆیی "یادەوەرییەکان" و فرمێسک مستەفا بە توێژینەوەیەک بەشداریمان کرد.

 

‎لەلایەکی دیکەوە: شانۆیی یادەوەرییەکان بە پاڵپشتی وەزارەتی فیدراڵی هونەر و کولتووری وڵاتی نەمسا بۆ ماوەی سێ ساڵە بەردەوامە و لە هەریەک لە نەمسا، ئەڵمانیا، چیک و چەند وڵاتێکی تر پێشکەش دەکرێت.

 

زانیاریی زیاتر: ئیلهام شاهین سەرۆکی فەخریی فیستیڤاڵەکە، خەڵاتی ڕێزلێنانی بەخشی بە هەر سێ خانمە هونەرمەندەکە.

 

ئەمەش بزانە: فێستیڤاڵی ساڵانەی شانۆیی "ئیزیس"ـی نێودەوڵەتی بۆ شانۆی ژن لە دووەمین خولیدا ماوەی هەفتەیەکی خایاند و 12 شانۆ و ژمارەیەک توێژینەوەی تێدا نمایش کرا.