ریاڵ و ئاڤا بردیانەوە

ئاڤا نیوز

ئەمشەو شەقامی ئیسکانی هەولێر شەوێکی بێوێنەی وەرزشی بەڕێكرد، هەوادارانی وەرزش بۆ بینینی یاریی کۆتایی خولی یانە پاڵەوانەکانی ئەوروپا  لە هەموو شارەکانی کوردستانەوە لەوێ کۆبوونەوە.

چیرۆکی سەرەکی: کاتژمێر 10:00ـی شەوی شەممە 01-06-2024 یاریی کۆتایی چامپیۆنزلیگ لەنێوان هەردوو یانەی ڕیال مەدرید و بڕووسیا دۆرتمۆند بەڕێوەچوو.

وێنە گەورەكە: بۆ یەکەمجار ئاڤا سپۆرت کەرنەڤاڵێکی جەماوەریی وەرزشی لە کەشێکی دۆستانەدا لە شەقامی ئیسکان بە ئامادەبوونی گەنجانی هەموو شار و شارۆچکەکانی کوردستان ڕێکخست، هەمووان لە سێ شاشەی گەورەوە سەیری یارییەکەیان كرد و چێنەر عەبدولقادر، ئەستێرەی دیاری وەرزشیی کوردستان و ئاڤا میدیا لە ستەیجی ئیسکانەوە شرۆڤەی یارییەکەی كرد. 

ئەوەی پێویستە بیزانیت: زیاتر لە هەزار گەنج لە پارێزگاکانی سلێمانی و دهۆک و شار و شارۆچکەکانی سەر بە ئیدارە سەربەخۆکان میوانی هەولێر و ئاڤا سپۆرت بوون.

ئەمەش بزانە: ڕێوشوێنی تووندی ئەمنی بۆ سەقامگیریی کەشی کەرنەڤاڵەکە گیرایەبەر و هیچ ڕووداوێكی نەخوازراو ڕووینەدا.