خافیێر میلیی؛ ئەو سەرۆکەی بە بڕیارەکانی ئەرجەنتینییەکانی هێناوەتە سەر شەقام

ئاڤادیجیتاڵ

خافیێر میلیی، سەرۆکی ئەرجەنتین نزیکە لەوەی پڕۆژەیاساکەی سەربگرێت، ئەو پرۆژەیاسایەی هاووڵاتییانی ئەرجەنتینی هێناوەتە سەرشەقام و هاواریان لێ بەرزبووەتەوە کە تێنەپەڕێنرێت چونکە بەشێکی زۆری هاوکارییەکانی حکومەت بۆ هاووڵاتییان دەبڕێت.

بۆچی گرنگە: لەدوای بوون بە سەرۆکی وڵات لە مانگی تشرینی یەکەمی 2023ـەوە، خافیێر میلیی چەندین یاسای توند و سەیری دەرکردووە کە بووەتە هۆی بێزارکردن و تووڕەکردنی خەڵکی وڵاتەکە. پڕۆژەیاساکە پێکهاتووە لە گۆڕینی 300 یاسا لە وڵاتەکەدا و تەنیا دەنگدانی ئەنجوومەنی پیرانی ماوە.

کاریگەریی و لێکەوتەکان: ئەنجوومەنی نوێنەرانی ئەرجەنتین پڕۆژەیاساکەی سەرۆکی وڵاتی پەسەندکرد کە بارگرانییەکی گەورە بۆ خەڵکی وڵاتەکە دروستدەکات. لەکاتی پەسەندکردنی پڕۆژەیاساکە بەشێکی زۆری هاووڵاتییانی ئەرجەنتین هاتنە سەر شەقام و خۆپیشاندانیان دژی پەسەندکردنی پرۆژەیاساکە کرد. 

لە بۆینس ئایرسی پایتەختی ئەرجەنتین هەزارەها خۆپیشاندەر دژی پلانەکانی سەرۆک هاوتافیان دەکێشا و دەیانگووت: وڵاتەکەمان بۆ فرۆشتن نییە.

ئەوەی پێویستە بیزانیت: یەکەم کاری میلیی تەمەن 53 ساڵ دوای بوون بە سەرۆکی وڵات، کەمکردنەوەی بەهای دراوی پیسۆی ئەرجەنتینی بوو بەڕێژەی 50%، هەروەها بڕینی هاوکارییەکانی حکومەت بۆ هاووڵاتییان و لابردنی سەدەها یاسای رێکخستنەوە بوو لەسەر ئابووریی وڵات.

ئەو مانایەی دەیگەیەنێت: پاکێجی چاکسازییەکەی خافیێر میلیی کاریگەری لەسەر چەندین بواری ژیانی تایبەتیی و گشتیی خەڵکی وڵاتەکە هەیە. سەرۆکی ئەرجەنتین سەرجەم پرۆژەکانی بنیادنان و بوژانەوەی وڵاتەکەشی ڕاگرتووە و خاوەندارییەتی تایبەتیشی لە کۆمپانیا زەبەلاحەکاندا نەهێشتووە.

پڕۆژەیاساکەی سەرۆکی ئەرجەنتین کاریگەری لەسەر هەلی کار، گەشتوگوزاریی، هێڵەکانی ئینتەرنێت، بواری دەرمان، بەرهەمهێنانی شەراب و بازرگانیش هەیە.

لێدوانی فەرمی: کاتێک میلیی هەڵبژێردرا بەڵێنیدا کۆتایی بە هەڵاوسان بهێنێت، بەڵام هۆشداری ئەوەیدا دۆخەکە پێویستی بە چارەسەرێکی "شۆک"ی ئابووریی هەیە و گوزەرانی خەڵک خراپتر دەبێت پێش ئەوەی بەرەوپێش بچێت. 

"ئامانجەکە ئەوەیە دەستبکەینەوە بە بنیادنانی وڵات و ئەو یاسایانە لابدەین کە ڕێگریی لە گەشەی ئابووریی کردووە"، ئەمە گوتەی خافیێر میلییە.

ژمارەکان وادەڵێن: ئەرجەنتین سێیەم گەورەترین ئابووریی ئەمریکای باشوورە، بەڵام بەهۆی قەرز و گەندەڵییەوە هەڵاوسان لە وڵاتەکە گەشتووەتە 140% و 40%ـی ئەرجەنتینییەکانیش لە هەژاریدا دەژین.