عێراق 14 هەزار مێگاوات کورتهێنانی لە بەرهەمهێنانی کارەبادا هەیە

ئاڤا نیوز 

قەبارەی کورتهێنانی بەرهەمهێنانی کارەبا لە عێراق 14 هەزار مێگاواتە، وەزارەتی کارەبا دەڵێت "ناتوانین کێشەی کەمیی کارەبا لە عێراق بنڕ بکەین".

وێنە گەورەکە: لەگەڵ هاتنی وەرزی هاوین، قەیرانی کارەبا لە عێراق زیاتر دەبێت و هاووڵاتیان ڕووبەڕووی کەمی کارەبا دەبنەوە، بەشێوەیەکی نیمچە ساڵانە خەڵك دژی نەبوونی خزمەتگوزاریی پێویست و کەمی کارەبا خۆپیشاندان دەکەن.

ڕاگەیێنراوی فەرمی: ئەحمەد موسا، گوتەبێژی وەزارەتی کارەبای عێراق ڕایگەیاند: "حکومەتی عێراق چەند هەنگاوێکی ناوە بۆ چارەسەرکردنی قەیرانی کارەبا، بەڵام ناتوانرێت کێشەکە بە بنەڕەتی چارەسەر بکرێت و ماوەیەکی زۆری دەوێت، بەتایبەتی کە کورتهێنانی بەرهەمهێنانی کارەبا دەگاتە 14 هەزار مێگاوات".

زانیاریی زیاتر: عێراق 24 بۆ 25 هەزار مێگاوات بەرهەمدەهێنێت لە کاتێکدا پێویستیی بە 36 بۆ 38 هەزار مێگاوات هەیە.

ئەوەی پێویستە بیزانیت: عێراق چەندین ڕێکەوتنی لەگەڵ ئەنجوومەنی هاریکاریی کەنداو، ئوردن و ئێران ئەنجام داوە بۆ گواستنەوەی کارەبا، بەڵام ناتوانێت پێداویستیی خۆی لە کارەبا دابین بکات.