ئەمساڵ 79 پەنابەر لە سنوورەكانی توركیا گیانیان لەدەست داوە

ئاڤا نیوز

 

بەگوێرەی ئاماری سەرۆكایەتیی كۆچ و كۆچبەرانی توركیا، لە شەش مانگی یەكەمی ئەمساڵدا ژمارەی ئەو پەنابەرانەی لە سنوورە وشكانی و ئاوییەكانی توركیا دەستگیركراون، گەیشتووەتە 95 هەزار و 827 پەنابەر.

 

ڕاگەیێنراوی فەرمی: فیدراسیۆنی سەراسەری پەنابەرانی عێراقی بڵاویکردووە، رێژەی دەستگیركردنی پەنابەران لەلایەن توركیاوە زۆر زیادی كردووە، سێ هەزار و 255 کەس لەو پەنابەرانەی تورکیا دەستگیری کردوون، خەڵکی هەرێمی كوردستان و عێراقن.

 

هۆکارە زانراوەکان: هۆكاری زیادبوونی ژمارەكە بۆ ئەوە دەگەڕێتەوە ئەمساڵ توركیا بە هاوكاری یۆنان سنوورەكانی تووندوتۆڵ كردووەتەوە. 

 

ژمارەکان وادەڵێن: پەنابەری ئەفغانی لە پلەی یەكەمی ئەو پەنابەرانەدان كە لە توركیا دەستگیركراون و ژمارەیان 30 هەزار و 247 پەنابەر، لەدوای ئەوانیش پەنابەرانی سووری لە پلەی دووەمدان، لە پلەی سێیەمیشدا پەنابەری توركمانستان.

 

زیانەکان بەمشێوەیە: ژمارەی ئەو پەنابەرانی لە شەش مانگی یەكەمی ئەمساڵدا لە سنوورەكانی توركیا گیانیان لەدەست داوە 79 پەنابەرە، ژمارەكە كەمی كردووە، ساڵی ڕابردوو لە هەمان ماوەدا 117 پەنابەر مردووە.

 

کاریگەری و لێکەوتەکان: لە شەش مانگی یەكەمی ئەمساڵدا پێنج  هەزار و 458 قاچاخچی دەستگیركراون كە بازرگانییان بە ژیانی پەنابەرانەوە كردووە.