هەوڵدەدرێت وەزیری كارەبا و سەرۆكوەزیرانی عێراق بانگهێشتی پەرلەمان بكرێن

ئاڤا نیوز 

بەشێک لە پەرلەمانتارانی عێراق هەوڵ دەدەن، بانگهێشتی وەزیری کارەبا بکەن، بۆ گفتوگۆ لەسەر قەیرانی کەمیی کارەبا و چارەسەرکردنی، پەرلەمانتارێکیش دەڵێت  بانگهێشتی سەرۆکوەزیرانیش دەکەن.

لێدوانی فەرمی: ئیبتیسام هیلالی، پەرلەمانتاری عێراق ڕایگەیاند: "پێویستە لەکۆتایی ئەم هەفتەیە پەرلەمان دانیشتنێکی تایبەت لەسەر قەیرانی کارەبا ئەنجام بدات و میوانداریی هەر یەک لە سەرۆکوەزیران و وەزیری کارەبا بکات ".

لە لایەکی دیکەوە: سەباح سوبحی، پەرلەمانتاری عێراق بە ئاڤا نیوزی ڕاگەیاند: "هەوڵێک لە لایەن بەشێک لە پەرلەمانتاران بە تایبەتی چوارچێوەی هەماهەنگی لە ئارادایە بۆ میواندارییکردنی وەزیری کارەبا نەک سەرۆکوەزیران لە لایەن هەردوو لیژنەی دارایی و کارەبا و وزە لەپێناو گفتوگۆکردن لەبارەی قەیرانی کارەبا لە عێراق".

وێنە گەورەکە: سەرەڕای ئەوەی لە بودجەی گشتیی عێراق پارەیەکی زۆر بۆ کەرتی کارەبا تەرخان کراوە، بەڵام هاووڵاتییانی عێراق بە دەست کەمی کارەبا و لاوازیی سیستەمی کارەباوە دەناڵێنن، بەشێوەیەکی گشتی شارەکانی عێراق پشت بە کارەبای مۆلیدەی ئەهلی دەبەستن.