بەهۆی نەبوونی کارەبا  لە دوو پارێزگای عێراق خۆپیشاندان دەستیپێکرد

ئاڤا نیوز

بەهۆی نەبوونی کارەبا و پچڕانی بە بەردەوامی، لە پارێزگاکانی زیقار و دیالە بەشێک لە هاووڵاتیان خۆپیشاندان دەکەن و ژمارەیەک ڕێگەیان داخستووە.

وێنە گەورەکە: بەم گەرمای هاوینە کاتژمێرەکانی پێدانی کارەبای نیشتمانی لە بەشێکی ناوچەکانی عێراق 10 بۆ 11 کاتژمێر دابەزیوە، لەگەڵ ئەمەشدا پچڕانێکی زۆری هەیە و ڕۆژانە دەگاتە 20 جار.

چی ڕوودەدات: بەپێی میدیا عێراقییەکان، خۆپیشاندەران ڕێگەیەکی سەرەکی و چەند شەقامێکیان لە باشووری شاری ناسریەی ناوەندی پارێزگای زیقار و دەوروبەری بە سووتاندنی تایە داخستووە و، داوای خزمەتگوزاری دەکەن بەتایبەت کارەبا.

لەلایەکی دیکەوە: دەیان کەس لە قەزای خاڵسی سەر بە پارێزگای دیالە دژ بە کەمی خزمەتگوزارییەکان و کەمی کاتژمێرەکانی پێدانی کارەبا و نەبوونی ئاو ڕژاونەتە سەر شەقامەکان و ڕێگای بەغدا – کەرکووکیان داخستووە.

ئەوەی پێویستە بیزانیت: لە پارێزگاكانی نێوەڕاست و خوارووی عێراق پلەكانی گەرما بەشێوەیەكی بەرچاو بەرزبووەتەوە، بەشێک لە ناوچە و شارەکان پلەی گەرمی 50 پلەی سەدی تێدەپەڕێنێت،  تا دێت کێشەی کەمی کارەبا زیاد دەکات و هاووڵاتیان بەدەست قەیرانەکەوە دەناڵێنن.