پارتی: داوامان کردووە سەرۆکی ئەنجوومەنی پارێزگای نەینەوا لە کارەکەی لاببرێت

ئاڤا نیوز  

ناکۆکییەکانی پارێزگای نەینەوا گەیشتووەتە ئاستێک کە لایەنەکانی بەسەر دووبەرەدا دابەشکردووە، 13 ئەندامی ئەنجوومەنەکە وەک ئۆپۆزسیۆن مامەڵە دەکەن، پارتی داوا دەكات سەرۆكی ئەنجوومەنەكە لە كارەكەی لاببرێت. 

وێنە گەورەکە: هاوپەیمانی نەینەوا موستەقبەل کە لەلایەن چوارچێوەی هەماهەنگیی پێکهێنراوە خاوەنی 16 کورسین ڕۆژی 02-07-2024 سەرۆكی یەكە ئیدارییەكانی هەڵبژارد، بەپێی نووسراوێكی فەرمیی سه‌رۆكایه‌تیی ئه‌نجوومه‌نی وه‌زیرانی عێراق - ده‌سته‌ی باڵای رێكخستنی پارێزگاكان داوای ڕاگرتنی گۆڕانکاریەكان دەکات.

لێدوانی فەرمی: ئەحمەد کیکی، ئەندامی ئەنجوومەنی پارێزگای نەینەوا لە پشکی پارتی بە ئاڤا نیوزی گوت: "لە دادگەی فیدراڵی سكاڵامان دژی دانیشتنەكەی ئەنجوومەن تۆماركردووە، داوا دەکەین سەرۆکی ئەنجوومەن و جێگرەکە لە پۆستەکانیان لاببرێن بەهۆی پێشێلکردنی یاساوە".

زانیاریی زیاتر: بەگوتەی ئەو ئەندامەی ئەنجوومەن، دەبێت بۆ دابەشکردنی پۆستەکان سەرەتا سیڤییەکان بە لیژنەیەکی تایبەتمەند بدرێت، دواتر بەدواداچوون بکرێت، دوای ئەوەش لە نێو ئەنجوومەن پێشکەش بکرێن و ئینجا دەبێت هەڵبژێردرێن.