هاکان فیدان: پەکەکە وەکو شێرپەنجە لە عێراق بڵاوبووەتەوە

ئاڤا نیوز

وەزیری دەرەوەی تورکیا عێراق بە وڵاتێکی بێسەروبەر ناودەبات و دەڵێت پەکەکە وەکو شێرپەنجە تێیدا بڵاوبووەتەوە. ئاشکراشی دەکات بیر لە دامەزراندنی هاوکاریی ئەمنیی هەرێمی لە ناوچەکە دەکەنەوە.

وێنە گەورەکە: پارتی کرێکارانی کوردستان (پەکەکە) بەرەی هەرە دیاری دژ بە تورکیایە و لە ناوچە جیاوازەکانی عێراق و هەرێمی کوردستان چالاکە، ئەنقەرەش بەردەوام هێرشیان دەکاتە سەر.

 

لێدوانی فەرمی: هاکان فیدان، وەزیری دەرەوەی تورکیا پێیوایە پەکەکە سوود لە 'بێسەرووبەری'ـی عێراق وەردەگرێت و دەیەوێت لەوێوە سەقامگیریی تورکیا بەئامانج بگرێت. جەختیش لە پێویستیی بەرەنگاربوونەوەی لە عێراق و سووریا دەکاتەوە.

 

زانیاریی زیاتر: هاکان فیدان لە دیدارێکی ڕۆژنامەوانیدا لەگەڵ سکای نیوز ڕەتی کردەوە پشتیوانی هیچ وڵاتێک بن دەستوەردان لە ناوچەکەدا بکات، بەڵام ئاشكرای دەکات بیر لە دامەزراندنی هاوکاریی ئەمنیی هەرێمی لە ناوچەکە دەکەنەوە.

 

لەلایەکی دیکەوە: وەزیری دەرەوەی تورکیا دەڵێت "پەکەکە وەکو خانەی شێرپەنجە لە عێراقدا بڵاوبووەتەوە، ئەمەش بە تەنیا کێشەی ئێمە نەماوە و بووەتە کێشەی ئاسایشی نیشتمانیی عێراق".