ئاسایشی هەولێر لەبارەی "دەستدرێژیكردنەسەر هاووڵاتییەك" ڕوونكردنەوە دەدات

ئاڤا نیوز

ئاسایشی هەولێر ڕەتیدەكاتەوە "دەستدرێژی كردبێتە سەر هاووڵاتییەك و ڕووداوەكەش بۆ كێشەیەكی كەسیی دەگێڕێتەوە".

چیرۆکی سەرەکی: پێشتر کەسێك بەناوی سەریاس عەونی، لە لێدوانێکدا ڕایگەیاندبوو" لەلایەن ئاسایشی هەولێرەوە دەستگیرکراوە و ئەشکەنجە دراوە".

ڕاگەیێنراوی فەرمی: بەڕێوەبەرایەتیی ئاسایشی هەولێر ڕایگەیاند:" دوای بڵاوبوونەوەی وێنە و لێدوانی هاووڵاتییەک بە ناوی سەریاس عەونی، کە گوایە لەلایەن  ئاسایشی هەولێر دەستدرێژیی کراوەتە سەر، بۆ هەموو لایەکی ڕادەگەیێنین، ڕاستی ڕووداوەکە کێشەیەکی کۆمەڵایەتی و کەسییە لە نێوان سەریاس عەونی و کارمەندێکی بنکەیەکی ئاسایش و لە ئەنجامی دەمەقاڵێی نێوانیان بە شەڕ هاتوون". 

زانیاریی زیاتر: دوای بەدواداچوون و لێکۆڵینەوە "بەرێوەبەرایەتیی ئاسایش هەڵساوە بە گرتنەبەری ڕێکاری پێویست لە بەرامبەر ئەو کارمەندە و دەستبەسەر کراوە، هاوکات داواش لە هاووڵاتی سەریاس عەونی کراوە، سکاڵای یاسایی لە پۆلیس تۆمار بکات بۆ ئەوەی مافی پارێزراو بێت". ئاسایشی هەولێر وا دەڵێت.