نرخی ڤیزای تورکیا هەرزان دەبێت

ئاڤا نیوز

 

دوای ناڕەزایەتیی کۆمپانیا فڕۆکەوانییەکانی تورکیا لە حکومەتی وڵاتەکەیان، بڕیارە نرخی خزمەتگوزارییەکانی پێدانی ڤیزا بە هاووڵاتیان کەم بکرێتەوە.

 

بۆچی گرنگە: ساڵانە ڕێژەیەکی بەرچاوی هاووڵاتیانی عێراق و هەرێمی کوردستان سەردانی وڵاتی تورکیا دەکەن، ئەم هەنگاوەش دەبێتە هۆی کارئاسانی و کەمکردنەوەی بارگرانی ماددی لەسەریان.

 

زانیاریی بەدەستهاتوو: ئاڤا نیوز لە سەرچاوەیەکی ئاگادارەوە زانیویەتی، کۆنسوڵخانەی تورکیا لە هەرێمی کوردستان داواکارییان پێشکەش بە حکومەتی وڵاتەکەیان کردووە و بۆ ئەوەی پێداچوونەوە بە نرخی خزمەتگوزارییەکانی ڤیزادا بکەن، چاوەڕوان دەکرێت سەرەتای مانگی ئایندە گۆڕانکاری لە نرخەکەیدا بکرێت.

 

شێوازی جێبەجێکردنی: داوا کراوە نرخی ڤیزا بۆ کەسانی خوار 15 ساڵ و سەرووی 50 ساڵ بکرێتە بەخۆڕایی، هەروەها بۆ کەسانی 15 بۆ 50 ساڵ نرخەکەی لە 185 دۆلارەوە بۆ 120 دۆلار کەم بکرێتەوە.

 

ئەمەش بزانە: لە دوو هەفتەی ڕابردوودا وەزارەتەکانی دەرەوەی عێراق و تورکیا بابەتی کەمکردنەوەی نرخی خزمەتگوزاریی ڤیزایان تاوتوێ کردبوو.