بازاڕی دراوە ئەلیکترۆنییەکان داکەوت و بیتکۆین 15% دابەزی

ئاڤا نیوز 

 

بەهۆی شەپۆڵی فرۆشتن بازاڕی دراوە ئەلیکترۆنییەکان داکەوت و بەهای بیتکۆین لە 24 کاتژمێری ڕابردوویدا نزیکەی 15% دابەزی، ئەمەش گەورەترین داکەوتنە لە دوای ساڵی 2021ـەوە.

 

چیرۆکی سەرەکی: بەهای دراوە ئەلیکترۆنییەکان بەگشتی داڕمان، لە دیارترینیان بیتکۆین تەنیا لە 24 کاتژمێری ڕابردوویدا 15.1%ـی بەهای لەدەستدا، هەفتەی ڕابردووش 13.1% دابەزینی تۆماکردبوو. بەمەش بەهای هەر بیتکۆینێک بە 51،734 دۆلار مامەڵەی پێوە دەکرێت، کە ئەمەش خراپترین داکەوتنە لە دوای داڕمانی بۆرسەی FTX.

 

ئەوەی ئێستا ڕوودەدات: بەگشتی بازاڕی بیتکۆین، تەنیا ئەمڕۆ بە گشتی 200 ملیار دۆلار دابەزیوە، دوای بیتکۆین، دراوە ئەلیکترۆنییەکانی دیکەش دابەزین، ئیسریۆم لە 24 کاتژمێردا 22% بۆ 2290 دۆلار دابەزی. بازاڕی دراوەکانی دیکەش وەک، باینانس کۆین، سۆلانا و ریپڵ سوورپۆش بوون. 

 

هۆکارە زانراوەکان: ئەو دابەزینە دوای شەپۆڵی فرۆشتنی دراوە ئەلیکترۆنییەکان دێت، بەتایبەت دوای ئەوەی گومانەکان زیاتر دەبن بە وەبەرهێنان لە زیرەکی دەستکرد کە تاچەند واقیعییە و بڵق نییە. لە هەمان کاتدا، دڵەڕاوکێ جیۆسیاییەکان لە رۆژهەڵاتی ناوەڕاست نادڵنیاییان لای وەبەرهێنەران زیاتر کردووە.