گەنجان 28%ی دانیشتووانی هەرێمی کوردستان و عێراق پێكدەهێنن

ئاڤا نیوز

نەتەوە یەکگرتووەکان ڕۆژی 12ی ئابی هەموو ساڵێکی وەک ڕۆژی گەنجان و لاوان دیاریکردووە، دەستەی ئاماری هەرێمی کوردستان و وەزارەتی پلاندانانی عێراق لە ڕابردوودا ئەوەیان خستووەتەڕوو، گەنجان ڕێژەی 28%ی دانیشتووان پێکدەهێنێن.

وێنە گەورەکە: بەگوێرەی ئەو پێوەرەی نەتەوەیەکگرتووەکان دیاریکردووە، تەمەنی گەنج  15 بۆ 24 ساڵ دەگرێتەوە، ئەمساڵ چالاکییەکان لەسەر ئاستی جیهان بە ناونیشانی "ڕێڕەوی دیجیتاڵی گەنجان و گەشەپێدانی بەردەوام" دانراوە.

ژمارەکان وادەڵێن: دواین ڕاپۆرتی دەستەی ئاماری هەرێمی کوردستان سەبارەت بە ڕێژەی دانیشتووان ساڵی 2021 بووە، لەو ڕاپۆرتەدا هاتووە "هەڕەمی دانیشتووانی هەرێمی کوردستان ڕەنگدانەوەی دانیشتووانێکی گەنجە" بەپێی ئامارەکە ئەوانەی تەمەنیان لەنێوان 15 بۆ 29 ساڵیدایە ڕێژەی 28%ی دانیشتووانی هەرێمی کوردستان پێکدەهێنن.

ئەوەی پێویستە بیزانیت: ئەگەرچی ئەمساڵ هێشتا وەزارەتی پلاندانانی عێراق هیچ ئامارێکی لەبارەی ڕێژەی دانیشتووان بڵاونەکردوەتەوە، بەڵام بەپێی ئاماری ساڵی 2023، ژمارەی دانیشتووانی عێراق  زیاتر لە 43 ملیۆن کەسە، لەو ژمارەیە ڕێژەی 28%ی گەنجانن.