ئاڤا وردەكاریی شێوازی ئەژماركردنی دەنگەكانی هەڵبژاردن بڵاودەكاتەوە

ئاڤا نیوز  

بەرپرسێکی کۆمیسیۆنی باڵای سەربەخۆی هەڵبژاردنەکان ئاشکرای دەکات، سیستەمی ئەمجارەی ئەژمارکردنی دەنگەکانی هەڵبژاردن جیاوازە لە ڕابردوو.

وێنە گەورەکە: کۆمیسیۆنی سەربەخۆی هەڵبژاردنەکانی عێراق تائێستا زۆربەی ڕێکارەکانی پرۆسەی هەڵبژاردنی پەرلەمانی کوردستانی تەواوکردووە، کە بریارە لە 20-10-2024 لەسەرجەم پارێزگاکانی هەرێمی کوردستان بەڕێوەبچێت.

لێدوانی فەرمی: خالید عەباس، بەرپرسی ئۆفیسی دهۆکی کۆمیسیۆن بە ئاڤا نیوزی ڕاگەیاند: ئەمجارە ئەژمارکردنی دەنگەکان بە سیستەمی (هێڵ) دەبێت، دوای دەنگدان، سەرجەم دەنگە دروستەکانی هاوپەیمانی و حیزب و تاکەکان کۆدەکرێنەوە و دابەش ژمارەی دیاریکراوی کورسی هەر بازنەیەک دەکرێت بۆ نموونە دهۆک 24 کورسییە، پاشان قەبارەی  دەنگی یەک کورسی دیار دەبێت.

زانیاریی زیاتر: دوای ئەوەی ژمارەی دەنگی کورسی زانرا، دەنگی بەدەستهاتووی هەر حیزبێک دابەش قەبارەی دەنگی هەر کورسییەک دەکرێت، پاشان دەردەچێت کە هەر لایەنێک چەند کورسیی بەدەستهێناوە، بە مەرجێک %30ی ژن بێت. خالید عەباس وادەڵێت.

ئەوەی پێویستە بیزانیت: سیستەمی (هێڵ) لەلایەن تۆماس هێڵ-ی بەڕیتانی بۆ ئەژمارکردنی دەنگی هەڵبژاردن دانراوە و زیاتر لە 200 وڵاتی جیهان پەیڕەوی دەکەن.