سەنتەری میترۆ: هەڵکوتانە سەر دەزگای چاودێر کاریگەری لەسەر ناوبانگی پایتەختی ڕۆشنبیری دەبێت

ئاڤا نیوز

 

سەنتەری میترۆ بەتووندی سەرکۆنەی هەڵكوتانە سەر ئۆفیسی سەرەكی تۆڕی ناوەندی چاودێر لە شاری سلێمانی دەكات، ڕایدەگەیێنین ئەم كردارە كاریگەری لەسەر ناوبانگی پایتەختی رۆشنبیری دەبێت و هەنگاوێكی چەوتی یەكلاكردنەوەی جیاوازیشە.

 

وێنە گەورەکە: ئێوارەی ڕۆژی پێنجشەممە هێزێکی یەکێتی دەستی بەسەر ئۆفیسی دەزگای چاودێردا گرت، کە ڕادیۆی مەدەنیەت، بنکە و سایتی گەلاوێژ، سایتی چاودێر، سایتی ڕوانگە و ڕەخنە، پلاتفۆرمی دابڕان، پرۆژەی پەیکەرسازی چاودێر، گەلەریی چاودێر لەخۆ دەگرێت.

 

ڕاگەیێنراوی فەرمی: ڕۆژی 06-09-2024، سەنتەری میترۆ ڕایگەیاند: بەتووندی سەرکۆنەی هەڵکوتانە سەر ئۆفیسی تۆڕی ناوەندیی چاودێر دەکەین کە مەلا بەختیار سەرپەرشتی دەکات.

 

زانیاریی زیاتر: میترۆ دەڵێت 'شۆکهێنەرە پایتەختی ڕۆشنبیری بکەوێتە دۆخێک، کە دەزگایەکی ڕۆشنبیریی مەدەنی بەزەبری هێزی سەربازی حیزبێکی ئەندام لە سۆسیالیست ئینتەرناشناڵ ببێتە هەواڵ و مانشێتی سەرەکیی کۆتایی هەفتە'.

 

ئەوەی پێویستە بیزانیت: سەنتەری میترۆ هەڵوێستەکەی بە بەرگریکردن لە ڕۆڵی گرنگ و چالاکی فکری و فەرهەنگی دەزگای چاودێر دادەنێت، پێیوایە سروشتی چ حیزبێکی تێپەڕاندووە و بووە بە دیاردەیەکی فەرهەنگی و فکری دیاری هەرێمی کوردستان.