داوای دوورخستنەوەی سەرۆکی دەستەی حەج و عومرەی عێراق دەکرێت

ئاڤا نیوز

 

کاردانەوەکان لەسەر دەرئەنجامی تیروپشکی ئەلیکترۆنی بۆ خوازیارانی حەج بەردەوامە و ژمارەیەک پەرلەمانتار داوای دوورخستنەوە و لێپرسینەوە لە سەرۆکی دەستەی حەج و عومرە دەکەن و داواش دەکەن پڕۆسەکە دووبارە بکرێتەوە.

 

وێنە گەورەکە: لە چەند ڕۆژی ڕابردوودا دەستەی حەج و عومرەی عێراق ناوی براوەکانی تیروپشکی ئەلیکترۆنی بۆ خوازیارانی حەج بۆ ساڵانی 2025-2026 و 2027 بڵاوکردەوە، دەرئەنجامی تیروپشکەکە کاردانەوەی زۆری بەدوای خۆیدا هێنا بەوەی بەشێکی زۆری بە ساڵاچووان لە پرۆسەکەدا ناویان نەگەڕاوەتەوە و گومان لە پاکی و بێگەردی پڕۆسەکە دەکرێت.

 

بڵاوکراوەی فەرمی: نیسان زایر، ئەندامی لیژنەی مافی مرۆڤ لە پەرلەمانی عێراق لە نووسراوێکدا کە ئاراستەی سەرۆکایەتیی پەرلەمانی کردووە داوا دەکات میوانداری سامی مەسعودی، سەرۆکی دەستەی حەج و عومرە بکرێت.

 

لەلایەکی دیکەوە: هادی سەلامی، پەرلەمانتاری عێراق لە نووسراوێکدا کە ئاراستەی سەرۆکوەزیرانی عێراقی کردووە داوا دەکات سامی مەسعودی، لە پۆستەکەی دوور بخرێتەوە، هاوکات داواش دەکات پڕۆسەی تیروپشکەکە دووبارە بکرێتەوە.

 

ئەوەی لەبارەیەوە دەگوترێت: ئیبتیسام هیلالی، پەرلەمانتاری عێراق داوای پێداچوونەوەی بە ئەنجامەکان کرد و ئاماژە بۆ ئەوە دەکات تێبینی و گومان هەیە سەبارەت بە پڕۆسەکە، هەندێک کەس ناویان گەڕاوەتەوە لە ئاست چاوەڕوانییەکاندا نەبووە.