داوا دەکرێت ئۆتۆمبێلی کارەبایی لە کرێی تابلۆ ببەخشرێت

ئاڤا نیوز 

 

دەستەی پاراستن و ژینگەی هەرێمی کوردستان داوای لە وەزارەتی ناوخۆ کردووە، دوو جۆر ئۆتۆمبێل لە کرێی تابلۆ ببەخشرێت.

 

چیرۆکی سەرەکی: پێشتر دەستەی پاراستن و ژینگە، داوای هه‌ڵگرتنی ڕه‌سمی گومرگیی له‌سه‌ر هاورده‌كردنی ئۆتۆمبێلی كاره‌بایی به‌ ڕێژه‌ی 100% کرد، داواکارییەکەش لەلایەن حکومەت جێبەجێکرا و هەفتەی ڕابردوو باجی لەسەر هەڵگیرا. ئێستاش لە چوارچێوەی هەنگاوەکانی برەودان بە پاراستنی ژینگەی هەرێمی کوردستان، دەستەکە داوا دەکات هەردوو جۆری ئۆتۆمبێلی هایبێرد و کارەبایی لە کرێی پێدانی تابلۆ ببەخشرێن

 

ڕاگەیێنراوی فەرمی: دەستەی ژینگەی هەرێمی کوردستان، لە نووسراوی ژماره‌ 202 ی 29-11-2024 داوایەکی ئاڕاستەی وه‌زاره‌تی ناوخۆی هه‌رێمی كوردستان کردووە، کە ئۆتۆمبێلی كاره‌بایی و هایبرێد له‌ كرێی تابلۆ ببه‌خشرین، وە کار ئاسانیی بکرێت بۆ تۆمارکردنیان  تاوەکو هاووڵاتییان هان بدرێن بۆ کڕینی ئەو ئۆتۆمبێلە ژینگە دۆستانە.

 

باکگراوند: بەپێی ئامارەکانی وەزارەتی بازرگانی و پیشەسازیی حکوومەتی هەرێمی کوردستان لە شەش مانگی ڕابردوودا، زیاتر لە 80 هەزار ئۆتۆمبیل هاوردەی هەرێمی کوردستان کراوە.