کامالا هاریس بۆ سوودانی: سەلامەتی كارمەندەكانمان دەوێت

ئاڤا نیوز

جێگری سەرۆکی ئەمریکا داوای سەلامەتی کارمەندەکانیان لە سەرۆکوەزیرانی عێراق دەکات و دەڵێت، پێویستە حکومەتی عێراق ڕێگری لە هێرشکردنە سەر کارمەندانی ئەمریکا بکات. 

 

وێنە گەورەکە: لە چوارچێوەی کۆڕبەندی ئاسایشی میونشن، کامالا هاریس، جێگری سەرۆکی ئەمریکا لەگەڵ محەممەد شیاع سوودانی، سەرۆکوەزیرانی عێراق کۆبووەوە؛ لەکاتێکدا دوای هێرشەکەی ئەمریکا بۆ سەر گرووپە میلیشیاکان لە بەغدا لە هەموو کاتێک زیاتر دەرکردنی هێزەکانی ئەمریکا لە عێراق باس دەکرێت.

 

ڕاگەیێنراوی فەرمی: بەپێی ڕاگەیێنراوی کۆشکی سپی، کامالا هاریس لە کۆبوونەوەکە بە سوودانی ڕاگەیاندووە "کاری لە پێشینەی ئێمە پاراستنی كارمەندەكانمانە، هەركاتێكیش پێویست بکات بەرگری لە خۆمان دەكەین، دەبێت حكومەتی عێراق ڕێگری لە هێرشەكان بۆ سەر بنكە وبارەگاكانی ئەمریكا بكات".

 

باکگراوند: لەگەڵ دەستپێکردنی شەڕی غەززە، زیاتر لە 170 جار گرووپە چەکدارەکانی نزیکی ئێران لە ڕۆژهەڵاتی ناوەڕاست هێرشیانکردووەتە سەر هێزەکانی ئەمریکا، لە هێرشێکیشدا بۆ سەر بنکەی تاوەری 22 لە ئوردن سێ سەربازی ئەمریکا کوژران، لەبەرامبەردا ئەمریکاش وەڵامی هێرشەکانی دایەوە.